Академийн хажууд нэгэн Гү өрөө байв. Тэр өрөө том биш, ердөө 60 метр квадрат орчим.

Гү мастерын Түвшин ахилтын замд Гү нь хүч чадлын түлхүүр болдог.

Хичээл тарахад догдолсон залуус Гү өрөө рүү уралдан гүйлдэв.

"Дараалалд зогсоцгоо, нэг нэгээрээ ор!" гэж гэнэт дуу гарлаа. Гү өрөөний гадна харуулууд зогсож байсан нь мэдээж. Залуус ээлж дараалан орж, гарч байв. Эцэст нь Фан Юаний ээлж ирлээ.

Энэ өрөө нэлээд нууцлаг байлаа. Дөрвөн хананд нь нүхнүүд байх бөгөөд тэдгээр дөрвөлжин хонхорууд дотор дахин өөр дөрвөлжин нүхнүүд байрлана. Нүх бүрийн хэмжээ өөр, зарим нь том, зарим нь жижиг. Том нь шавар тогооноос хэтрэхгүй, харин жижиг нь нударгаас багагүй.

Эдгээр нүхнүүдэд янз бүрийн сав байрласан байв. Саарал чулуун сав, ногоон хаш таваг, нарийн хийцтэй өвсөн тор, шавар зуух гээд төрөл бүр. Тэдгээр саванд олон янзын Гү хадгалагдаж байлаа.

Зарим Гү чимээгүй, зарим нь дуу чимээ гарган жиргэх, дуугарах, сэрчигнэх зэрэг авиа гаргана. Энэ бүх дуу нийлж, амьдралын нэгэн төрлийн симфони мэт сонсогдоно.

Гү ч бас есөн том түвшинд хуваагддаг, яг Гү мастерын есөн түвшинтэй адил. Фан Юань эргэн тойрноо ажиглаад шууд ойлгов. Энд байгаа бүх Гү нэгдүгээр түвшнийх.

Ерөнхийдөө нэгдүгээр түвшний Гү мастер зөвхөн нэгдүгээр түвшний Гү ашиглаж чадна. Илүү өндөр түвшний Гү хэрэглэвэл асар их үнэ төлөх хэрэг гарна. Түүнээс гадна Гүүг тэжээх шаардлагатай. Өндөр түвшний Гүүг тэжээх зардал нь доод түвшний мастеруудын хувьд дийлэхийн аргагүй байдаг. Тиймээс шинэхэн Гү мастерууд ихэвчлэн онцгой нөхцөл биш л бол анхны Гүүгээ заавал нэгдүгээр түвшний Гүүгээс сонгодог.

Гү мастер анхны Гүүгээ сонгох нь асар их ач холбогдолтой. Энэ нь түүний амин Гү болж, амь настай нь холбогдоно. Хэрвээ энэ Гү үхвэл, Гү мастер асар их цохилт амсана.

"Харамсалтай нь би анх Цэцэгт Дарс Ламын Дарсны өтийг олж, түүнийг амин Гүүгээ болгохыг хүссэн. Гэвч одоогоор түүний ясыг хаана байгааг олж чадаагүй. Хэзээ олдох нь ч тодорхойгүй, эсвэл өөр хүн түрүүлж олж магадгүй. Аюулгүй байдлын үүднээс эхлээд Сарны гэрлийн Гүүг сонгосон нь дээр." Фан Юань дотроо санаа алдан, зүүн ханын дагуу шулуун алхлаа.

Тэр ханын дээд эгнээнд мөнгөн тавгууд эгнэн байрласан байв. Тавга бүр дээр нэг Гү байлаа.

Эдгээр Гү нь тунгалаг, хавирган сар хэлбэртэй, хөх кварцын хэлтэрхий мэт харагдана. Мөнгөн тавгийн дэвсгэр дээр тэд намуухан, үзэсгэлэнтэй туяа цацруулж байв.

Эдгээрийг Сарны гэрлийн Гү гэцгээдэг. Энэ бол Гү Юүэ овгийн онцгой Гү бөгөөд олон гишүүд нь үүнийг амин Гүүгээ болгон сонгодог. Сарны гэрлийн Гү нь байгалиас үүссэн биш, харин Гү Юүэ овгийн нууц аргаар үржүүлсэн төрөл зүйл юм. Өөр газарт огт байдаггүй, овгийн бэлгэдэл гэж хэлж болно.

Бүгд нэгдүгээр түвшний Сарны гэрлийн Гү тул хоорондоо ялгаа бараг байдаггүй. Фан Юань санамсаргүй нэгийг сонгон авлаа. Энэ Гү маш хөнгөн, цаас шиг л жинтэй. Түүний алганд багтах хэмжээтэй, жирийн хаш зүүлттэй ойролцоо. Гар дээрээ тавихад, тэр Гүгийн цаанаас алганы судлуудаа хүртэл харж байв.

Сүүлчийн удаа шалгаж, ямар нэг асуудал байхгүйг мэдээд Фан Юань Сарны гэрлийн Гүг халаасандаа хийж, Гү өрөөнөөс гарлаа. Гадна нь дараалал урт хэвээр байлаа. Түүний араас орж ирэх хүн догдлон яаран дотогш орлоо.

Бусад хүмүүсийн хувьд Гүүгээ авмагц гэртээ харьж, аль болох хурдан боловсруулж эхлэх байсан. Харин Фан Юань яарахгүй байлаа. Түүний бодол одоо ч Дарсны өт дээр төвлөрсөн хэвээр.

Дарсны өт нь Сарны гэрлийн Гүгээс хавьгүй үнэ цэнэтэй. Хэдийгээр Сарны гэрлийн Гү нь Гү Юүэ тосгоны онцлог боловч, Гү мастерын хувьд Дарсны өт шиг их ашиг өгдөггүй.

Гү өрөөнөөс гармагцаа Фан Юань шууд уушийн газар луу явлаа.

"Дэлгүүрийн эзээн, хуучин дарснаас хоёр сав!" Фан Юань халаасаа ухаж, үлдсэн хэдэн анхдагч чулуунуудаа гарган лангуун дээр тавив.

Сүүлийн өдрүүдэд тэр энд ирж дарс авч, дараа нь тосгоны зах руу яван тэнэж, Дарсны өтийг татахыг оролдож байв. Дэлгүүрийн эзэн намхан, тарган, тослог царайтай дунд эргэм насны эр байлаа. Эдгээр өдрүүдэд тэр Фан Юанийг аль хэдийн таньдаг болжээ.

"Эрхэм ээ, та ирчисэн үү." Тэр мэндчилэнгээ бүдүүн, богино гартаа анхдагч чулуунуудыг чадварлаг хамж авлаа. Гар дээрээ дээш доош жинлэн шалгаад, жин нь зөв байгааг мэдээд инээмсэглэл нь улам тодров.

Анхдагч чулуу нь энэ дэлхийн мөнгөн тэмдэгт бөгөөд бүх барааны үнэ цэнийг хэмжихэд ашиглагдана. Үүний зэрэгцээ энэ нь дэлхийн мөн чанарын нягтарсан хэлбэр бөгөөд өөр дээрээ ашиглах боломжтой, Гү мастерын Түвшин ахилтад чухал нөлөөтэй.

Мөнгөний шинж чанартайгаас гадна хэрэглээний шинж чанартай тул, Дэлхийн алттай төстэй. Дэлхийд алтны стандарт байдаг бол, энэ ертөнцөд түүнийг анхдагч чулуу орлодог. Гэвч худалдан авах чадлын хувьд анхдагч чулуу нь алтаас ч илүү.

Гэхдээ Фан Юань ингэж үргэлжлүүлэн зарцуулсаар байвал, хэчнээн их анхдагч чулуутай байсан ч хангалтгүй байх нь гарцаагүй.

"Өдөрт хоёр сав дарс, бүтэн долоо хоног үргэлжиллээ. Эхний хадгаламж бараг дуусчихлаа." Фан Юань хоёр сав дарс барин уушийн газраас гарч явахдаа үл ялиг хөмсгөө зангидлаа.

Хүн Гү мастер болмогц анхдагч чулуунаас шууд анхдагч мөн чанар гарган авч, нүх сүв дэх анхдагч тэнгисээ дүүргэж чадна. Иймээс Гү мастеруудын хувьд анхдагч чулуу нь зөвхөн мөнгө биш, мөн Түвшин ахилтын нэмэлт эх үүсвэр болдог. Хэрвээ хангалттай анхдагч чулуутай бол Түвшин ахилтын хурд эрс нэмэгдэж, авьяас багатай гэсэн сул талыг нөхөх боломжтой.

Маргаашаас эхлээд дарс авах анхдагч чулуу ч үгүй болно. Гэтэл Дарсны өт гарч ирэхгүй л байна. Үнэхээр Сарны гэрлийн Гүг амин Гү болгож боловсруулах хэрэгтэй юу? Фан Юань дотроо сэтгэл дундуур байв.

Тэр хоёр сав дарс барин алхах зуураа бодлоо үргэлжлүүлэв. "Академийн ахлагч анхны амин Гүгээ боловсруулж чадсан хүн 20 анхдагч чулуу авна гэсэн. Одоо бүгд гэртээ сууж, Гүгээ боловсруулж, эхний байрны төлөө өрсөлдөж байгаа байх. Харамсалтай нь амин Гү боловсруулах нь ихэвчлэн авьяасаас хамаардаг. Анхдагч авьяас өндөр байх тусам давуу талтай. Минийх шиг С зэрэглэлтэй авьяасаар, онцгой арга байхгүй л бол ялах ямар ч боломжгүй."

Яг энэ үед араас нь Гү Юүэ Фан Жэний дуу сонсогдов.

"Ах аа, та үнэхээр уушийн газраас очиж дарс авсан байна! Надтай яв, авга ах, авга эгч чамтай уулзахыг хүсэж байна."

Фан Юань зогсоод эргэж харлаа. Тэр дүү нь өмнөх шигээ толгой гудайлган ярьдаг байхаа больсныг анзаарав. Одоо ах дүү хоёр нүүр нүүрээ харан, тас ширтэн зогсож байлаа.

Салхи үлээж, том ахын замбараагүй богино үсийг хийсгэн, дүүгийн хувцасны хормой намирна.

Ердөө нэг сарын хугацаа өнгөрсөн ч, хүн өөрчлөгддөг.

Сэрэх Ёслолоос хойшхи нэг долоо хоногт ах, дүү хоёрт асар их өөрчлөлт гарчээ. Ах Фан Юань үүлнээс газарт унаж, суут ухаантны нэр нь бутран унасан. Харин дүү нь гялалзан мандаж, шинэ од мэт аажмаар өндийж байв.

Гү Юүэ Фан Жэний хувьд энэ өөрчлөлт нь ертөнцийг нь орвонгоор нь эргүүлсэнтэй адил байлаа. Тэр эцэст нь ахынхаа өмнө мэдэрч байсан тэр мэдрэмжүүдийг амсав. Хүмүүсийн найдвар тээх, атаархал, жөтөөнд автсан харцаар ширтүүлэх тэр мэдрэмж. Тэр өөрийгөө харанхуй булангаас гэнэт татан гаргаж, гэрлээр дүүрэн тэнгэрт тавьсан мэт санагдана. Өглөө бүр сэрэхдээ сайхан зүүдэнд байгаа мэт мэдрэмж төрнө. Өмнөхтэй харьцуулахад харьцаа нь тэнгэр газар шиг ялгаатай болж, бодит байдалдаа итгэхэд ч бэрх, бас дасахад ч хэцүү байв.

Дасахад үнэхээр хэцүү.

Өмнө нь хэн ч анзаарахгүй байсан хүн гэнэт бүхний анхаарлын төвд орно гэдэг амаргүй. Заримдаа замаар алхахад хүмүүс түүний тухай ярьж, магтаж байгааг сонсоно. Нүүр нь халуу шатаж, яахаа мэдэхгүй болж, хүмүүсийн харцнаас зайлсхийж, бүр алхахаа ч мартчих шахна!

Эхний арван өдрүүдэд Фан Жэн турж эцсэн ч, эрч хүч нь улам нэмэгдэв. Зүрхний гүнд нь "өөртөө итгэх итгэл" хэмээх зүйл аажмаар бүрэлдэж эхэлжээ.

'Ах өмнө нь ийм мэдрэмжийг үргэлж мэдэрдэг байсан байх даа... ямар сайхан атлаа ямар хүнд мэдрэмж вэ!'

Тэр өөрийн эрхгүй ах Гү Юүэ Фан Юанийг бодсоор байлаа. Ийм анхаарал, ярианы дунд ах нь яаж байж чаддаг байсан юм бол?

Тэр өөрийн мэдэлгүй Фан Юанийг дуурайж, үргэлж илэрхийлэлгүй царай гаргахыг оролдсон ч, удалгүй өөрт нь тохирохгүйг ойлгов. Заримдаа хичээлийн үеэр охины нэг үгнээс л нүүр нь улайна. Зам дээр ахимаг насны эмэгтэйчүүдийн тоглоом шоглоомноос болж хэд хэдэн удаа зугтаж байсан.

Тэр яг алхаж сурч буй бяцхан хүүхэд шиг, шинэ амьдралдаа дасах гэж бүдэрч, унасаар байлаа. Энэ бүх хугацаанд ахынх нь тухай яриаг сонсохоос зайлсхийж чадсангүй. Сэтгэлээр унасан, архичин болсон, шөнө гэртээ ирэхээ больсон, хичээл дээр унтдаг гэх мэт.

Тэр үүнд маш их цочирдсон. Урьд нь хүчирхэг, суут хэмээн өргөмжлөгдөж байсан ах нь гэнэт ийм болчихсон гэж үү?

Гэвч аажмаар ойлгож эхлэв. Ах нь ч бас эцсийн эцэст жирийн хүн. Ийм их цохилт, ийм том уналттай нүүр тулбал хэн ч сэтгэлээр унах нь гарцаагүй.

Гэхдээ энэ ойлголттой зэрэгцэн, Фан Жэний зүрхний гүнд хэлэхэд хэцүү нэгэн баяр төрж байлаа. Тэр мэдрэмжийг хүлээн зөвшөөрөхөөс туйлын дургүй байсан ч, оршин байгааг нь үгүйсгэж чадахгүй.

Өмнө нь үргэлж түүнийг сүүдэрт дарж байсан суут ах нь одоо ийм дорой байдалд орсон. Өөр өнцгөөс харвал энэ нь түүний өөрийн өсөн дэвшилтийн баталгаа биш гэж үү?

Одоо жинхэнэ онцгой нь тэр өөрөө!

Иймээс Фан Юанийг дарсны сав барьсан, үс нь сэгсийсэн, хувцас нь замбараагүй байгааг хараад Фан Жэн сэтгэл нь амрав. Амьсгал нь хүртэл хөнгөрөв. Гэвч тэр,

"Ах аа, архиа болиоч дээ! Ингэж болохгүй ээ! Танд санаа зовж байгаа хүмүүс ямар их байгааг та мэдэхгүй. Та сэрэх хэрэгтэй!" гэж хэлэв.

Фан Юань ямар ч сэтгэл хөдлөлгүй байж, юу ч хэлсэнгүй. Ах дүү хоёр бие бие рүүгээ ширтэн зогссоор.

Дүү Гү Юүэ Фан Жэний нүд хурц, гэрэлтсэн байв. Харин ах Гү Юүэ Фан Юаний нүд гүн хар, эртний цөөрөм мэт нам гүм. Тэр харц нь Фан Жэнд үл ойлгогдох дарамт төрүүлэв. Удалгүй тэр өөрийн эрхгүй харцаа бурууллаа.

Гэвч тэр даруй уур төрсөн ба энэ уур уцаар зөвхөн өөр лүү нь чиглэж байлаа.

'Яачихав аа? Ахынхаа нүд рүү эгц харж чадахгүй гэж үү? Би өөрчлөгдсөн, бүрэн өөрчлөгдсөн!'

Ингэж бодоод тэр дахин харцаа хурцалж, ах руугаа ширтэв. Гэвч Фан Юань аль хэдийн түүн рүү харахаа больсон байлаа. Хоёр гартаа дарсны сав барьсан хэвээр хажуугаар нь өнгөрч,

"Юугаа гөлөрч зогсоов? Явъя." гэж хайхрамжгүй хэлэв.

Фан Жэний амьсгал алдагдаж, дотор нь хуримтлагдсан тэр мэдрэмж гарч чадахгүй, тайлбарлашгүй гуниг төрүүлнэ.

Ах нь аль хэдийн холдож эхэлснийг хараад тэр яаран алхлаа. Гэвч энэ удаа толгойгоо гудайлгасангүй, харин нар өөд өргөнө. Харц нь өөрийн хөл рүү чиглэж, ах Фан Юаний сүүдэр дээр гишгэлж байв.