11-р бүлэг

Маргааш өглөө нь тэдний бэлтгэл албан ёсоор эхлэх байсан ч хуваарьт хичээл нэг ч байсангүй. Харин хүн бүр сэрэхэд өөрсдийн бүлгийг хариуцсан багш ирж, шинээр өдөр тутмын хуваарийг нь танилцуулах хүртэл өрөөндөө хүлээх ёстой гэсэн зарлал иржээ.

Карлын өмнө нь сонсож байсан ямар ч сургуулиас хавьгүй тайван хичээлийн орчин шиг санагдаж, элитүүдийн амьдралд улам атаархах болов. Магадгүй аз нь таарч, буруу хариулт хэлэхэд сурагч руу хашхирдаггүй, анхаарал сарних бүрд сургуулиа тойруулж гүйлгэхийг эмчилгээ гэж үздэггүй эелдэг, зөөлөн багштай ч болох юм билүү.

Өглөөний цайн дээр Карл Харцагад зориулж дахиад нэг бүтэн шарсан тахиа, бас төрөл бүрийн түүхий мах цуглуулав. Гэхдээ шөнөжин өссөнөөс болоод араатны идэх хэмжээ түр багассан байлаа.

Мангас араатнуудын жишгээр Салхин Хурдат Харцага том махчинд тооцогдохгүй. Харин гайхалтай хараа, довтлох хүчнийхээ ачаар маш аюултай. Нас бие гүйцэх тусам ихэнх нь [Урах] чадварын мэдлэгээ төгөлдөржүүлж, өөрөөсөө хавьгүй том олзыг ганцхан цохилтоор буулгах хэмжээнд хүрдэг.

Нас бие гүйцсэн шувуу ердөө хэдхэн килограмм жинтэйг бодвол энэ нь тийм ч сүртэй сонсогдохгүй байж мэднэ. Гэхдээ чадварын эзэмшил хангалттай өндөр түвшинд хүрвэл мангас төгс эзэмшсэн чадварынхаа хүчээр өөрөөсөө нэг зэрэглэл дээгүүр мангасыг ч отож дайраад алж чаддаг.

Ийм зүйл хийж чаддаг араатан тийм ч олон биш бөгөөд энэ бүхэн Салхин Хурдат Харцагын чадвар сурах гайхалтай хурдны үр дүн байлаа.

Багш нь ирж уулзахад үд аль хэдийн нэлээд өнгөрсөн бөгөөд Карл цэцэрлэгт зүгээр зогсож хүлээсээр уйдаж эхэлжээ. Тэр [Урах]-ыг онилох нарийвчлал, идэвхжүүлэх хурдаа сайжруулахын тулд ядарч цуцталаа бэлтгэл хийж, дараа нь хэсэгхэн дугхийсэн байв. Гэхдээ эндээс цааш яг яах ёстойгоо сайн мэдэхгүй, авсан сурах бичгүүдийн уутанд ч энэ талаар юу ч байсангүй.

Хаалгыг огцом тогших чимээ түүнийг сэрээж, Карл яаран очиж нээхэд гадна нь хурц төрхтэй эмэгтэй цэрэг зогсож байлаа.

"Өдрийн мэнд, Карл. Би чиний тулааны ур чадварын багш. Намайг Түрүүч Рита гэж дуудаж болно. Би чамд тулааны урлаг, элитүүдэд зайлшгүй хэрэгтэй чадваруудыг заахаас гадна хувийн зөвлөх багш чинь болно. Академийн зүгээс чиний ангилал бусад дайчдынхаас хэт өөр тул өдөр бүрийн тулааны бэлтгэлийг эс тооцвол ердийн хичээлийн хуваарь чамд бараг хэрэггүй гэж үзсэн. Тиймээс одоохондоо бид хоёр хамтран ажиллана.

Энд хичээл хийх хангалттай зай байна уу, эсвэл анги руу шилжихийг хүсэж байна уу?"

Карл хүссэн зүйлдээ бараг хүрчээ. Рита яавч царай муутай биш. Гэхдээ зан чанарын хувьд эелдэг, зөөлөн гэдгээс аль болох хол хүн шиг санагдав. Академийг тойруулж гүйлгэх нь ч түүний дуртай заах аргуудын жагсаалтаас хасагдах зүйл биш бололтой.

"Тагтан дээр тохирох газар байгаа. Ороод ирнэ үү, Түрүүч ээ."

Сүүдрэвч хичээл хийхэд хамгийн тохиромжтой газар мэт санагдав. Ид шидийн бэлтгэлийн големууд, зөвхөн өөрийнх нь давхарт хүргэдэг шат болон энэ дотуур байрны бусад хачин зүйлсийг бодоход өмнөх ахлах сурагчийн үлдээсэн ургамлууд асуудал болно гэж Карл төсөөлсөнгүй.

Түрүүч Рита сонирхсон янзтай араас нь орж, дараа нь тагтан дээр гарлаа. Гэхдээ түүнийг гайхшруулсан зүйл нь ургамлын тоо биш байв.

"Эд бүгд саяхан усалсан юм уу?" гэж тэр асуулаа.

"Өрөөнд услах заавар үлдээсэн байсан. Ихэнхийг нь долоо хоногт нэг л удаа услах ёстой юм байна. Хамгийн сүүлд хэзээ усалсныг мэдэхгүй байсан болохоор нүүж орсон өдрөө бүгдийг нь усалчихсан. Нэлээд хуурай харагдсан ч одоохондоо бүх зүйл сайн байгаа." гэж Карл мөрөө хавчаад сүүдрэвч рүү алхав.

"Энэ ч дажгүй байр байна. Байгальтай их ойр юм. Энд үйлчилж байгаа ид шидээс болоод тагтан дээр бороо ордог эсэхийг мэдэхгүй ч бусдаар бол азтай таарчээ.

Одоо зөв бэлтгэлийн төлөвлөгөө гаргахын тулд би чиний хүчний талаар мэддэг бүхнийг чинь сонсох хэрэгтэй. Бие махбодын сайжрал ямар байна? Ганцхан өдрийн бэлтгэлийн дараа чадварын хүч хэр өөрчлөгдөв? Бас өөр юу хийж чаддагийг чинь илтгэх ямар нэг сэжүүр байна уу?

Чамд худлаа хэлэхгүй. Голем эсвэл ид шидийн бүтээлийг өөрийнхөө өмнөөс тулалдаанд оруулж чаддаг ангиллууд онцгой шившлэг ашигладаг Шидтэнгүүдээс бусад бүх ангиллаас хавьгүй эрэлттэй байдаг. Гэхдээ анхнаасаа алсын довтолгоотой байгаа болохоор чиний нөхцөл тийм ч муу биш." гэж Түрүүч чин сэтгэлээсээ хэлэв.

Түүний ингэж илэн далангүй ярьсан нь Карлыг гайхшруулав. Зөвлөх багшийн хувьд Рита үнэхээр түүний сайн сайхныг бодож байгаа мэт санагдана. Хэт олон зүйл нуух нь өөрт нь ямар ч ашиггүй тул Карл бүхнийг ил тод хэлсэн нь дээр гэж шийдэв.

Магадгүй тэр Карл болон Харцагыг хэрхэн хүчирхэгжүүлэхийг мэдэж ч болох юм.

Карл анхаарлаа төвлөрүүлээд Араатан сургах орон зайнаасаа Харцагыг гаргаж ирэв.

"Эндээс эхэлсэн нь дээр байх. Энэ бол Харцага. Миний чадвар түүнийг гал тогоонд байсан өндөгнөөс сэрээсэн. Энэ чадвар түүнийг миний оюун санаан доторх нэг орон зайд боломжийн тухтай амьдрах боломжтой болгодог, бас бидний бодол хоорондоо холбогдсон.

Түүнтэй гэрээ байгуулсны дараа би бүх Салхин Хурдат Харцага ашигладаг довтолгооны чадвар болох [Урах]-ыг ашиглаж чаддаг болсон. Мөн миний мэдрэхүй асар их сайжирсан."

Түрүүч Рита хүлээн авсан мэдээллээ ойлгох гэж хэдэн секунд бяцхан шувуу руу ширтэв.

"Тэгэхээр чиний чадвар мангастай гэрээ байгуулаад... дараа нь яадаг гэсэн үг вэ? Тэдний чадварыг ашигладаг юм уу? Сүртэй сонсогдож байна л даа, гэхдээ бусад мангастай тулалдахын тулд ийм зам сонгоно гэдэг өндөр эрсдэлтэй хэвээр." гэж тэр асуулаа.

"Тийм ч байж магадгүй. Гэхдээ бид хоёр бие биенийхээ юу бодож байгааг мэддэг. Жаахан бэлтгэл хийчихвэл би ганцаараа тулалдах шаардлагагүй байх. Харцага надтай хамт байна." гэж Карл хэлэв.

Түрүүч Рита инээмсэглэв.

"Тэгвэл чамд өөр нэг араатны зулзага олж болох эсэхийг үзье. Салхин Хурдат Харцаганаас илүү сайн тулалддаг нэгийг олж чадвал чи хүчирхэг элитүүдийн нэг болох бодит боломжтой болно."

Төрөөд удаагүй байхад нь өөрөөр солино гэсэн санааг сонссон Харцага дургүйцэн чанга дуугарав.

[Энэ эмэгтэйд ичих нүүр гэж алга уу? Салхин Хурдат Харцагыг басамжилж байх шив. Би нас бие гүйцэхээрээ Командлагч зэрэглэлд хүрнэ гэдэгтээ итгэлтэй байна. Харин тэр ердөө Дэвшсэн зэрэглэлийн дайчин. Надад ганц сар өгчих. Тэгвэл би түүнийг зодож чадна гэдэгт мөрийцье.]

Харцага оюун санаагаар ярьж байхдаа гадаа гарсан болохоор зэрэгцэн чих цоолом чарлаж, Түрүүч уурласан ангаахай руу ёжтой инээмсэглэн харав.

"Юу гэж байна?" гэж тэр асуулаа.

"Тэр нас бие гүйцэхээрээ Командлагч болно, харин та Дэвшсэн зэрэглэлдээ хэвээр байна гэж байна." гэж Карл үгийг нь товчлон дамжуулав.

Түрүүч Карл руу муухай харахад тэр бууж өгсөн янзтай хоёр гараа өргөлөө.

"Та өөрөө асуусан шүү дээ. Тэр л тэгж хэлсэн. Би энд зүгээр л орчуулагч."

"Тэгэхээр ийм насандаа ч холбоотой, цэгцтэй бодолтой байх хэмжээний оюун ухаантай юм байна. Сонирхолтой. Өнөөдөр дөнгөж эхний өдөр гэдгийг мэдэж байна, гэхдээ та хоёр хамтарч ажиллахдаа юу хийж чадахыг харахын тулд бэлтгэлийн талбай руу явсан нь дээр байх."