27-р бүлэг : Шинэ эд зүйл
Чэнь Гө шинэ үзвэртэй танилцахаар орлоо. Дотоод бүтэц болон зохион байгуулалт нь Пин Ан апартменттэй яг ижилхэн бөгөөд тэндэхийн айдас түгшүүр, зовлон шаналал яг л амьд мэт мэдрэгдэж байв. Арав гаруй урхи, занга байх бөгөөд олон өрөөнүүд хоорондоо нууц хаалгаар холбогджээ. Үүнээс гадна хэд хэдэн жихүүдэс хүрмээр нууц зүйлс ч байлаа.
[Энэ газар үнэхээр бодит мэт санагдаж байна, яг л өрөөнөөс зугтдаг тоглоомд төгс тохирохоор юм; хэсэг хугацааны дараа үйлчлүүлэгчдээр туршуулж үзье дээ.]
Тэнд зогсох үед урьд шөнийн дурсамжууд Чэнь Гөгийн толгойд эргэн ирж, тэрээр өөрийн эрхгүй чичирхийлэв. Тэр хамгийн бодитой туршлагыг өөрийн биеэр туулсан шүү дээ. Цаг давчуу байсан тул Чэнь Гө зөвхөн тоймлон хараад л доош буулаа; эцсийн эцэст, гадаа үйлчлүүлэгчид хүлээж байгаа.
Урд хаалганд хүрэхээс ч өмнө Чэнь Гөд Шюй Ванийн дуу сонсогдов. "Та бүхэн түр хүлээгээрэй, Дарга удахгүй ирэх байх аа. Тэр болтол та бүхэн цэцэрлэгт хүрээлэнгийн бусад тоглоомууд дээр тоглож болно шүү дээ."
"Охин минь, дарга чинь үнэхээр Аймшгийн байшин дотор байгаа юм уу? Бид өнгөрсөн шөнө түүний шууд дамжуулалтыг үзсэн; түүнийг ойд арав гаруй хүн хөөж байсан шүү дээ! Тэр үнэхээр тийм аймшигтай нөхцөл байдлаас мултарч чадсан юм уу?"
"Чи тоглож байна уу‽ Би ч бас үзэгчдийн нэг нь байсан; стриймерийг хэсэг галзуучууд апартмент дотор бүслээд, улам бүр ойртож байсан. Түүнийг тийм урхинаас зугтаж чадсан гэдэгт би үнэхээр итгэж өгөхгүй байна."
"Бид нэг шууд дамжуулалт үзэж байсан гэдэгтээ итгэлтэй байна уу? Өчигдөр шөнө дуу чимээнээс өөр юу ч байхгүй, зүгээр л тас хар дэлгэц байсан шүү дээ, та нар яаж ийм их мэдээлэл олж мэддэг байна аа?"
"Ямартай ч, бид түүнийг харахаар энд ирсэн; амьд байхгүй байсан ч үхсэн цогцос нь байхад л болно!"
Хүмүүсийн шуугилдах чимээ хэтэрхий чангарч, Шюй ахын анхаарлыг татлаа. Ийм олон хүн цугларсныг хараад тэр баярлах, санаа зовох зэрэгцэн зогсоно. Хэзээнээс ч юм, нурж унах гэж байсан энэ Аймшгийн байшин гэнэтхэн л Шинэ Зуун цэцэрлэгт хүрээлэнгийн гол үзвэр болж хувирчээ. Олон хүмүүс өглөө эртлэн ирж оочерлох болсон байлаа.
Уг нь бол энэ гарцаагүй сайн мэдээ мөн боловч, үйлчлүүлэгчдийн амнаас гарах үгсийг сонсох бүрд түүний зүрх түгшинэ.
[Үүнийг ингээд үргэлжлүүлж болохгүй ээ. Чэнь дүүтэй дараа таарах үедээ заавал ярилцах хэрэгтэй. Залуу хүн хөдөлмөрч байгаа нь сайн хэрэг ч, би түүнийг буруу зам руу хазайлгаж болохгүй шүү дээ!]
Хашааны хаалга онгойж, Чэнь Гө Аймшгийн байшингаас гарч ирлээ. "Та бүхнийг хүлээлгэсэнд уучлаарай. Аймшгийн байшин одоо нээлттэй. Тасалбарын үнэ 20 юань; хүүхэд орохыг хориглоно."
Олон хүн тэр даруй чимээгүй болов. Түүний хэд хэдэн үзэгчид урьд шөнийн талаар асуултаар булахаар түүн рүү гүйн ирлээ. Ингээд Чэнь Гө таван минутын турш од боллоо. Үүний дараа хүмүүс эмх цэгцтэйгээр цувран Аймшгийн байшин руу орж эхлэв.
Өмнөх сургамжаасаа болоод Чэнь Гө 'Хар баасан гараг' аяыг давтан тоглуулж зүрхэлсэнгүй. Оронд нь урт дууны эффектүүдийн жагсаалт руу хольж, санамсаргүйгээр тоглуулахаар тохируулав. Чэнь Гө Шюй Ваньд нүүр будалт хийхэд нь тусалж, түүгээр 'Сүнсний хурим' үзвэр дотор хүмүүсийг дагуулж явуулахаар оруулаад, өөрөө үүдэнд үлдэж тасалбар зарлаа.
[Үйлчлүүлэгчдийн тоо аажмаар өсөж, нэр хүнд ч бас ихээхэн нэмэгдсэн байна. Хэрэв ингээд үргэлжилбэл, би хэд хоногийн дотор Аймшгийн байшингаа өргөтгөх (томруулах) шаардлагыг хангах нь ээ.]
Чэнь Гө хар гар утсаа гаргаж ирэн байшингаа өргөтгөхөд шаардагдах үйлчлүүлэгчдийн тоо хэр дутуу байгааг шалгаж, мөн өдөр тутмын шинэчлэгдсэн даалгаврыг харлаа.
Хялбар даалгавар: Хэрэв та үйлчлүүлэгчдэд жинхэнэ аймшгийг мэдрүүлэхийг хүсэж байвал, хамгийн түрүүнд тэдний Аймшгийн байшингаар аялах хэмнэл болон айлгах цаг мөчийг зөв тооцоолох хэрэгтэй. Айдсыг хэт эрт мэдрүүлэх нь үйлчлүүлэгчдийн сонирхлыг бууруулах талтай тул тэднийг хаана явж байгааг хянахын тулд Аймшгийн байшинд дуу мэдрэгч эсвэл хяналтын камер суурилуулахыг зөвлөж байна.
Ердийн даалгавар: Айдсын хамгийн гол түлхүүр бол гэнэтийн байдал юм. Жишээлбэл, үйлчлүүлэгчдийн анхаарлыг татдаг ердийн цэгийн эсрэг талд айлгах зүйлээ байрлуул. Бүх эд хэрэглэлүүд энэ шаардлагад нийцэж байгаа эсэхийг Аймшгийн байшин дотор шалгаж үз.
Хар дарсан зүүдний даалгавар: Шөнө дунд бүр угаалгын өрөөнөөс хачирхалтай чимээ гардаг. Хэрэв та яагаад гэдгийг мэдэхийг хүсвэл миний зааврыг дагана уу.
Өдөр тутмын даалгавар нь өдөр бүр шөнө дунд шинэчлэгдэнэ. Хэрэглэгч өдөрт зөвхөн нэг даалгавар сонгох боломжтой бөгөөд шагнал нь даалгаврын хүндрэлээс хамаарна.
(Анхааруулга! Даалгавар хэдий чинээ хэцүү байна, төдий чинээ аюултай байх тул болгоомжтой сонгоно уу!)
Өдөр тутмын даалгаврыг гүйлгэж харсныхаа дараа Чэнь Гө хамгийн түрүүнд Хар дарсан зүүдний даалгаврыг алгасав. Хоёр шөнө дараалан нойргүй хоносны дараа түүнд юунаас ч илүү амралт хэрэгтэй байв. Түүнээс гадна, түүнд хэдийнээ нэг Толины мангастай учраа олох асуудал байсан бөгөөд хоёр мангастай нэгэн зэрэг тэмцэлдэж чадна гэж өөртөө итгэхгүй байлаа.
[Хар дарсан зүүдний даалгавруудын шагналууд надад ямар нэгэн ур чадвар өгөх зэргээр шууд хэрэг болох магадлалтай ч, шагнал нь эрсдэлтэйгээ үргэлж тэнцүү байдаг тул түр хугацаанд үүнийг алгасъя. Хялбар даалгаварт тодорхой хэмжээний мөнгө шаардагдана; ядаж л Ван Чиг баривчилсан шагналын мөнгө орж ирэх хүртэл үүнийг биелүүлэх боломжгүй юм байна.]
Чэнь Гө сонголтуудаа бодож үзсэний эцэст Ердийн даалгаврыг хамгийн боломжтой нь гэж дүгнэв.
[Айлгах зүйлсээ хүний анхаарлын төвийн яг эсрэг талд байрлуулах, энэ тийм ч муу санаа биш байна. Үүнийг Аймшгийн байшиндаа хэрэгжүүлэх нь үйлчлүүлэгчдэд илүү их 'гэнэтийн бэлэг' барих нь гарцаагүй.]
Ердийн даалгаврыг сонгосныхоо дараа Чэнь Гө үүдэнд налан зогсох зуураа дотор байгаа Шюй Ваньтай байнга холбоо барьж заавар өгч байлаа.
Удалгүй үд дунд болж, хүмүүс аажмаар тарж эхлэв. Чэнь Гө, Шюй Ванийг дуудаж гаргаж ирээд өдрийн хоолондоо ороорой гэж хэлчихээд, өөрөө 'Сүнсний хурим' үзвэрийн давхарлуу ганцаараа буцаж орлоо. Тэрээр энэ үзвэрийг өөрийн гараар зохион бүтээсэн бөгөөд айлгах хэсэг бүрд маш их анхаарал хандуулсан байв. Тэр Ердийн даалгаврыг сонгосон тул Шюй Ванийг эзгүй байх хооронд үдээс хойших цагийг бүхэлд нь үзвэрийг шинэчилж, сайжруулахад зориулав.
Ердийн үед үйлчлүүлэгчид Аймшгийн байшин руу орохдоо сэтгэл зүйн хувьд бэлтгэлтэй ордог тул тэднийг айлгах тийм ч амар байдаггүй. Тиймээс түүнд анхаарлыг нь сарниулж, тэр зүгээс ямар нэгэн зүйл үсрээд гараад ирэх гэж байна гэж бодуулах зүйл хэрэгтэй байлаа. Хуурамч айдаст тэдний бүх анхаарал төвлөрөх зуур, жинхэнэ айлгах зүйлс нь тэдэн рүү огт төсөөлөөгүй зүгээс нь дайрах юм.
Энэ Ердийн даалгавар нь Чэнь Гөгийн төсөөлж байснаас хамаагүй амархан байв. Хэдхэн цагийн дараа тэрээр даалгаврыг биелүүлсэн гэсэн мэдэгдлийг хар гар утаснаасаа хүлээж авлаа.
"Та Ердийн даалгаврыг амжилттай биелүүллээ. "Хүнийг айлгах маш олон арга байдаг ч, хамгийн сайн айлгах арга бол гэнэтийн цочрол өгөх явдал юм" Баяр хүргэе, та даалгаврын шагнал болох 'Гавал хагалагч эмчийн дүрэмт хувцас'-ыг авлаа!
"Гавал хагалагч эмчийн дүрэмт хувцас (Эд зүйл- Хувцас): Кларк сэтгэцийн эмнэлэгт хорт гаруй жил ажилласан. Сэтгэцийн өвчтэй хүмүүстэй байнга харилцах нь түүний амьдралыг үзэх үзлийг аажмаар гажуудуулжээ.
Нэгэн өдөр тэрээр бүх зүйлийг нэгмөсөн дуусгавар болгохоор шийдсэн байна. Тэрээр галзуурлын үндэс нь өвчтөнүүдийнх нь тархи руу нэвчсэн гэж итгэж байсан тул цорын ганц шийдэл нь гавлыг нь хагалж өвчний эх үүсвэрийг шууд гаргаж авах явдал байв! Бүгд өвчтөнүүдээ аврахын тулд шүү дээ!"
'Хар баасан гариг'-ийн дараа Чэнь Гө дахин нэг эд зүйл хүлээж авлаа.
(Орч: Хар баасан гариг гэсэн нэртэй хориотой дууг өмнө нь шагнал болшож авсан)
Тэр аппликэйшн рүү ортол, хар гар утас түүнд энэхүү эд зүйлийг эд хэрэглэлийн өрөөнд байрлуулсан гэдгийг мэдэгдэв.
[Цаг хугацааны хувьд яг сайхан таарлаа. Хэрэв үүнийг 'Шөнө дундын аллага' үзвэртэй хослуулбал, үнэхээр гайхалтай зохицол болох нь ээ.]
Чэнь Гөгийн толгойд хэд хэдэн санаа урган гарав. Тэр утас нь дуугарах үед тэдгээр санаануудаа бичиж авахаар үзэг, цаас шүүрэн авлаа.
"Хө Сань уу?" Чэнь Гө утсаа авав. "Юу байцгаана?"
"Дарга аа, та миний өнгөрсөн удаа хэлснийг санаж байгаа биз дээ?" Хө Сань хэн нэгэн сонсчих вий гэж айсан мэт дуугаа намсгав. "Өнгөрсөн удаа таныг Гао Рүшюэ эгчийг уйлтал нь айлгасны дараа манай тэнхимийн ах нар таниас өшөөгөө авахаар дайны бүлэглэл байгуулсан талаар‽ Тэд аль хэдийн замдаа гарчихсан байна! Дарга аа, та бэлтгэлтэй байсан нь дээр шүү!"