13-р бүлэг

Ажилд орсон эхний өдрөө л багийнхнаасаа "Хөөе, шинэ цэрэг ээ! Чи удахгүй үхэж магадгүй шүү, хаха! Тоглосон юм аа~" гэх мэт үгс сонсвол ямар хариу үйлдэл үзүүлэх ёстой байдаг юм бол?

Үнэндээ үүнд тохирох зөв хариулт гэж үгүй. Үгүй ээ, үнэхээр шүү. Ямар ч хариулт өгсөн буруудахаар байлаа. Аз болоход хамт олон маань сэдвийг хурдан өөрчилж, надаас сүртэй хариу үйлдэл хүлээсэнгүй.

"Юутай ч үхлийн аюултай сорилтыг давсанд баяр хүргэе!" [Үнэхээр л ингээд шууд хэлчихэж байгаа юм уу?] "Гэхдээ чи үнэхээр энэ ээлжийнхээ шилдэг нь юм уу? Гайхалтай юм аа." "Алив ээ, жаахан онгирохыг чинь сонсъё!"

Би өөрөө ч хүртэл үүнд нь гайхаж байв. "Өө, хэрвээ тэр тийм чадалтай байсан бол бид бүгд Сөүлийн Үндэсний Их Сургуульд орчихсон байх байсан биз." "Ямартай ч үнэхээр гайхалтай. Чи манай багт маш сайн нэмэлт хүч болж байна."

Ээлжийнхээ шилдэг нь байх бас ч гэж давуу талтай аж. Энэ хэлтэс ажлын ачаалал ихтэйгээсээ болоод шинэ ажилтнуудыг дээрэлхэх ч сөхөөгүй байдаг бололтой.

"Багийн ахлах удахгүй буцаж ирнэ. Тэр гадуур ажилтай яваа болохоор одоохондоо зүгээр л амарч бай."

Би ахлахын зааврыг дагаж, тусгаарласан хэсэг рүү явлаа. Тэнд дөрвөн ширээ бөөгнөрүүлэн тавьсан байв. Хажууд нь жижиг буйдан, яг л 80-аад оны үеэс гараад ирсэн мэт хуучны загвартай радио тавьсан кофены ширээ байлаа. Ахлахууд ширээ рүүгээ буцах зуураа буйдан руу дохив.

"Очоод тэнд суучих."

Намайг суухтай зэрэгцэн кофены ширээн дээрх радио асаж, шаржигнасан дуу гаргалаа. Цоглог арын хөгжим, хөтлөгчийн цангинасан дуу хоолой өрөөгөөр цуурайтав.

"Сайн байцгаана уу! Энэ бол замын хөдөлгөөний шууд мэдээ. Яг л өнөөдрийн нарлаг цаг агаар шиг Сөүлийн замууд одоогоор түгжрэлгүй байна! Гэхдээ өнөөдөр үдээс хойш…"

Би цонх руу толгойгоо эргүүлэв. Гадаа шиврээ бороо орж байлаа. Бодит байдлаас илт зөрсөн мэдээ. [Энэ радио... чөтгөрийн түүхийн нэг хэсэг байна.]

Dark Exploration Records / Чөтгөрийн түүх : <Dark Exploration Records>-д багтсан чөтгөрийн түүх : Daydream Inc.-ийн таних код – Qterw-E-63

Энэ бол замын хөдөлгөөний мэдээгээр дамжуулан тухайн өдрийн аз хийморийг хэлж өгдөг хачирхалтай радио юм. Заримдаа зөвлөгөө өгдөг ч тэр нь маш айдас хүрэм бөгөөд ихэнхдээ аймшигт үр дагаварт хүргэдэг.

"Чи үүнийг анзаарчихав уу?" "Хөөх, энэ шинэ цэрэг чинь сэргэлэн юм аа. Хачирхалтай байгааг нь хурдан анзаарлаа шүү."

Биеийн тамирын чиглэлээр хичээллэдэг болов уу гэлтэй эрэгтэй ахлах дөхөж ирээд радиог унтраав. "Энэ эд чинь замын хөдөлгөөний мэдээгээр өдрийн аз хийморийг хэлж өгдөг юм. Харьцангуй аюулгүй хотын домог гэх үү дээ. Twilight-Class Darkness буюу баталгаажсан чөтгөр."

"Байж байгаарай, чи сая 'Хотын домог, Darkness гэж ямар чөтгөр нь юм бэ' гэж бодсон уу?" "Чам шиг шинэ цэргүүдэд зориулж бид үүнийг бэлдсэн юм. Та-да!"

Тэрээр ширээн дээр таблет гаргаж тавив. Дэлгэц дээр хэд хэд товшсоны дараа нэгэн бичлэг тоглууллаа.

"Үүнийг дуустал нь үзээрэй."

Хөгжилтэй хэрнээ чанар муутай найрал хөгжим эгшиглэхэд 80-аад оны хуучны уур амьсгал намайг бүрхэн авав. 88 оны олимпын маскотуудыг санагдуулам хоёр хүүхэлдэйн баатар гарч ирээд бөхийв.

"Мөрөөдөл, хүсэл тэмүүллээр дүүрэн шинэ ажилтнууд аа! Daydream Inc.-ийн Талбайн судалгааны багт тавтай морил!"

"Өнөөдөр бид Талбайн судалгааны баг ямар догь ажил хийдэг талаар дэлгэрэнгүй тайлбарлах болно!"

[Үнэг, луу хоёр уу?]

Уламжлалт солонгос ханбуг өмссөн улаан үнэг, шар луу хоёр тод инээмсэглэж байлаа.

"Гэхдээ эхлэхээсээ өмнө!"

Өхөөрдөм хоёр маскотын дээр хэтэрхий хуучинсаг фонттой бичиг гарч ирэв. 'Daydream Inc. гэж ямар компани вэ?'

Олон нийтийн хувьд энэ байгууллага нь үс уналтын эсрэг шидэт эмчилгээ, арьс арчилгааны бүтээгдэхүүнээр дагнасан маш амжилттай эмийн компани билээ.

"Та биднийг зөвхөн үс уналтын эсрэг эмчилгээ хийдэг гэж бодоо юу? Бурхан минь! Үнэндээ Daydream Inc. танд хэрэгтэй байж болох ямар ч эмийг бүтээж чадна!" "Ид шидийн ханд хийдэг жинхэнэ шидэт компани!"

Хар тамхины донтолтоос салгах эмчилгээнээс эхлээд мөнхийн амьдралын рашаан хүртэл... Энэ компани бүх төрлийн гайхалтай хандыг бүтээж, түүнийгээ элитүүд болон улс төрийн хүрээнийхэнд нууцаар худалддаг.

Энэ бол Daydream Inc.-ийн жинхэнэ дүр төрх юм. Ер бусын ханд үйлдвэрлэдэг нууц байгууллага.

[Одоогийн шинжлэх ухаан, бодит байдал дээр огт боломжгүй зүйл шүү дээ…]

Үнэгэн маскот нүдээ ирмэж, хуруугаа өргөв.

"Гэхдээ! Ид шидийн ханданд ид шидийн орц хэрэгтэй." "Тэр орц бол… 'Dream Essence'!"

'Dream Essence' гэдэг үг тод алтлаг үсгээр гарч ирэх бөгөөд дэлгэц даяар гялалзсан шингэн сүрлэгээр урсаж эхэллээ. Яг л ид шидийн хандны тухай гардаг хүүхдийн хүүхэлдэйн кино шиг зүрх, одод үсчиж байсан ч… Түүний жинхэнэ мөн чанар нь тэс өөр зүйл байв.

"Dream Essence-ийг ер бусын үзэгдлээс хурааж авдаг!"

Луу гараа сунгахад дэлгэц шилжив. Өхөөрдөм зургийн хэв маягаар хотын нарийн гудамжийг харууллаа. Гэтэл гудамжны гэрлийн сүүдэрт улаан нүднүүд анивчиж, хажуугаар өнгөрөх хүнийг заналхийлсэн мангасын дүрс болон хувирав.

Дараагийн хэсэгт, унтаж буй хүний дээгүүр эргэлдэх сэнс ирээ долоож байгаагаар хэтрүүлэгтэй дүрслэн харуулав.

"Орчин үеийн нийгэмд хүртэл ер бусын үзэгдлүүд гарсаар байдгийг та мэдэх үү?" "Битүү өрөөнд сэнс ажиллуулах нь үхэлд хүргэдэг, эсвэл маш их шүүмжлэл сонсох нь урт наслахад тусалдаг... Эдгээр нь бүгд мухар сүсэг, хотын домгууд юм!" "Гэхдээ заримдаа эдгээр хотын домгууд бодит байдал болдог!"

[Тэгэхээр тэд үүнийг хотын домог гэж нэрлэж байгаа юм байна…]

Үнэхээр ч 'хотын домог' гэж нэрлэх нь 'крипипаста' гэснээс хавьгүй дээр сонсогдож байв. Тэгээд хамгийн чухал хэсэг нь гарч ирлээ.

"Daydream Inc. нь эдгээр хотын домгуудыг удирдаж, 'Dream Essence'-ийг цуглуулан, хүмүүсийн хүслийг биелүүлэх гайхамшигт ид шидийн ханд хийдэг!" "'Dream Essence' бол компанийн хувьд хамгийн чухал нөөц биш гэж үү, Го Ён Ин?"

"Тэгэлгүй яах вэ! Бидэнд энэ үргэлж хэрэгтэй... Гэхдээ хэн бидэнд зориулж 'Dream Essence'-ийг цуглуулах вэ?"

Го Ён Ин гэх нэртэй луун маскот толгойгоо хазгайлав.

"Мэдээж хэрэг зоригт Талбайн судалгааны баг шүү дээ!"

SD анимейшн дээр хослол өмссөн оффисын ажилтнууд эрхий хуруугаа гозойлгож, бүх төрлийн бодит бус үйл явдлууд өрнөж буй орон зайг зоригтойгоор туулж байгаагаар дүрсэлжээ.

"Зоригт, ухаалаг Талбайн судалгааны багийн ачаар Dream Essence цуглуулагч дахин нэг удаа дүүрлээ!"

Дэлгэцэн дээр өтгөн хөмсөгтэй маскот нэг гартаа ямар нэгэн зүйл бахархалтайгаар дээш өргөлөө. Хэмжээст зураастай зөөврийн бортог. Энэ бол 'Dream Essence Collector' юм.