38-р бүлэг

Яг энэ үед, Судалгааны 1-р багийн оффист.

[Цаг гаруйхны дотор дахиад л давчихлаа...]

D-багийн тэмдэглэлийг шалгах зуураа ажлаа аргалж суусан нэгэн судлаач шүдээ зуув.

[Тэд өнөөдрийг хүртэл хэдэн оноо цуглуулсан бэ? 5,000P гэсэн үү?]

Энэ янзаараа хэдхэн жилийн дотор тэд Хүслийн тасалбар олж авсан хамгийн хурдан дээд амжилтыг эвдэж магадгүй нь...

Судлаач хорсолтойгоор бувтнав.

"Бидний зарим нь лабораторид хашигдаж, элдэв янзын аймшигтай зүйлстэй нүүр тулдаг ч, аюулын нэмэгдэлгүйгээр сард арай ядан 500 оноо цуглуулдаг байхад."

"Гэтэл нэг шинэков сарын дотор л 50,000 оноо хамах гэж..."

Судлаач амаа хамхив.

Энэ нөхцөл байдлын талаар гомдоллож ч чадахгүй байгаа нь түүнийг дотор нь улам бухимдуулж байлаа.

Нэг л зүйл буруу байв.

[Зарим хүмүүс аз таарч, хамгийн сайн тоноглолыг сонгоод л амархан оноо цуглуулж байх юм.]

Гэтэл бусад нь тийм оноо эсвэл давуу эрх эдлэхийг зүүдэндээ ч төсөөлж чаддаггүй.

[Талбайн судалгааны баг судлаачдын дор байх ёстой. Бид бол элитүүд, бид илүү сайн халамж хүртэх ёстой—энэ чинь шударга бус байна.]

Энэ бол түүний чин сэтгэлийн бодол байлаа.

Мэдээж хэрэг, тэрээр Талбайн судалгааны багийн ажилчдыг 'туршилтын хархнууд' хэмээн тохуурхдаг байснаа өөрт ашигтайгаар мартсан байв.

"Яах вэ дээ, сүнсний судалгааны үед заримдаа ажил аяндаа л бүтчихдэг юм. Ийм л байдаг шүү дээ."

Тасгийн дарга Квак Жэкан инээмсэглэсээр судлаач руу хандан хөнгөхөн үг чулуудав.

"Гэхдээ энэ тохиолдол бол арай л өөр гэдгийг хүлээн зөвшөөрч байна."

Судлаачийн барайсан царайг үл тоон, Квак Жэкан бичиг баримтуудыг эргүүлэн харав.

"Өө нээрээ, энэ аймшгийн түүх рүү ороход 10-аас дээш хүн шаардлагатай гэж дуулсан уу?"

"Аан, тийм ээ. Зөв өө. Аймшгийн түүх рүү ороход арван хүн хэрэгтэй."

Квак Жэкан инээмсэглэсээр үзгээ шүүрэн авлаа.

"Тэгвэл багийн хамтын ажиллагаа шаардагдах нь ээ."

– Томилогдсон: A, D болон Y баг

Квак Жэкан нэрсийн жагсаалт гаргаж ирээд багуудыг тэмдэглэхийг судлаач харж зогсов.

Тэгээд ийм зүйл болов.

"Талбайн судалгааны багуудын цагаан толгойн дэс дараалал ямар утгатайг чи мэдэх үү?"

Тэрээр зөвхөн өөрийнхөө ажлыг л робот шиг хийж, толгойгоо гудайлган явдаг байсан болохоор өөр хэлтсийн зохион байгуулалтын бүтцийн талаар сайн мэддэг байх ямар ч боломжгүй байв.

Квак Жэкан инээж, бичиг баримтуудыг хөнгөхөн тогшив. Энэ нь нэг л хачин төрлийн инээд байлаа.

"Нэг үгээр хэлбэл, ажлын гүйцэтгэлээр нь эрэмбэлсэн хэрэг."

"Сургуулиудад гүнзгийрүүлсэн, энгийн, бас хоцрогдолтой сурагчдын анги гэж байдгийг чи мэднэ биз дээ?"

Судлаач гэнэт нэг зүйлийг ухаарав.

"Тэгвэл... D-баг нь гүнзгийрүүлсэн анги нь юм уу?"

Эрс няцаасан хариу ирэв.

"A-гаас C хүртэлх нь. Тэд нар л элитүүд."

Квак Жэкан үзгээрээ холбогдох багуудын нэрсийг тогшив.

"Үлдсэн нь зүгээр л золиосных."

Хоромхон зуур ч атугай судлаачийн сэтгэл бага зэрэг уужрав.

"Гэхдээ хоёулангийнх нь дунд үлдэх яриа шүү... Сүүлийн үед D-багийн гүйцэтгэл маш сайн байгаа болохоор дараагийн томилгооны үеэр тэднийг том дэвшинэ гэсэн цуу яриа гараад байгаа. Хаха."

Аливаа корпорацын хов живийн адил, иймэрхүү хэт итгэлтэй мэдэгдлүүд нь ихэвчлэн найдваргүй цуу яриа байдаг.

Гэсэн ч судлаач бага зэрэг түгшиж байв.

[Ямар нэгэн муу мэдээ байгаа юм уу?]

Яг л энэ үгийг хүлээж байсан мэт Квак Жэкан харамссан өнгө аясаар нэг зүйл бувтнав.

"Гэхдээ хөгшөөн, үнэхээр муу цаг таарлаа. Тэд A-багтай хамт орох нь..."

"......! Элит багтай хамт орох нь муу хэрэг юм уу?"

"Тэгэлгүй яах вэ. Чи яагаад гэдгийг нь мэдэж байгаа биз дээ?"

Квак Жэкан эрүүгээ илэв.

"Зарим нэг аймшгийн түүхэнд зугтах гарц нээхийн тулд золиос шаардлагатай үе гэж байдаг юм."

Ялангуяа олон хүнтэй баг орох шаардлагатай үед.

Квак Жэкан мөрөө хавчив.

"Энэ удаагийн судалгаа бидэнд ярих сэдэв мундахгүй ихийг өгөх нь ээ."

Өнгөрсөн сарынхтай л адил, D-баг дуудлага хүлээн авч, 17-р давхар руу гарлаа. Тэнд тэднийг гэнэтийн дүр зураг угтсан юм.

Судалгааны 1-р багийн оффист өөр зочид ирсэн байв.

Төрөл бүрийн баг зүүсэн хүмүүс.

[Тэд Талбайн судалгааны багийн өөр багийнх юм болов уу?]

Би хурдхан шиг хэдэн хүн байгааг тоолов.

Тэнд долоо орчим хүн байлаа.

Тэдний дунд миний таньдаг хүн байв.

– Үхсэн хүнийг амилуулж чадах уу?

Энэ бол чиглүүлэх сургалтын үеэр Хүслийн тасалбарын тухай асууж байсан өнөөх шинэ ажилтан байлаа.

Үхрийн баг зүүсэн тэрээр ширээ налан, толгойгоо гудайлган чимээгүй зогсож байв. Түүний эргэн тойронд үл ялиг гунигтай аура мэдрэгдэж байлаа.

Компанийн зүгээс үснээс нь болж дарамталж магадгүй гэж бодмоор, эрэгтэй хүн гэхэд үс нь нэлээд урт байв.

Мэдээж хэрэг, энэ өрөөнд байгаа хэнд ч тиймэрхүү зүйл огт хамаагүй бололтой.

Оффисын өрөөг дүүргэсэн хүмүүсийг харсан D-багийн ахмадууд бишрэх, санаа алдах холилдсон байдалтайгаар хариу үйлдэл үзүүлэхэд...

"Өө, D-багийнхан эцэст нь ирлээ шүү! Орцгоо, орцгоо~ Товч мэдээллээ эхэлье."

Квак Жэкан гарч ирээд бүгдийг залгаа байрлах хурлын өрөө рүү дагуулж оров.

Биднийг алхах зуур Дэд менежер Ин нэг зүйл асуухыг би санамсаргүй сонсчихлоо.

"Бид бусад багуудтай хамт орох юм уу?"

"Тийм ээ, тийм."

Дэд менежер Ин эргэн тойрноо гүйлгэж харснаа, над руу чимээгүйхэн дөхөж ирээд, бусдад сонсогдохооргүй нам дуугаар шивнэв.

"Тэр алтлаг тэмдэгтэй баг зүүсэн ажилчдыг харж байна уу?"

"Тэр бол A-баг."

[Тэд бол элит баг.]

Daydream Inc.-д хэн нэгэн аймшгийн түүхүүдийг давж, нөөцийг нь олборлож байж л компани хэвийн ажиллах боломжтой байв.

[Компани дампуурах гэсэн зохиолын цоорхойноос сэргийлэхийн тулд ажилдаа хүнээс гажууд сайн хэсэг бүлэг хүмүүс байх л ёстой...]

Тийм учраас л A-баг цуутай хүмүүс олонтойгоороо алдартай байсан юм. Би хөнгөхөн толгой дохив.