32-р бүлэг
[Үндсэн үнийг нь бодвол энэ нь хамгийн үнэтэй нь шүү дээ.]
Түүнээс гадна, Тасгийн дарга И Жэхоны цөцгийн тосны хутга "нөөц хангамж"-ийн зориулалттай байсныг бодоход энэхүү "валют" нь сонирхолтой хамтын ажиллагааг бий болгоно гэж найдаж байв.
Би зоосыг машинд ойртууллаа.
Мөнгөлөг туяа гялбахыг харсан гүрвэлийн хүүхэн хараа томорч ирэв.
"Дурсгалын зоос байгаа юм. Аялж явахдаа бэлэг дурсгал болгож авсан ч... яагаад ч юм бэ үүнд тохирох юм шиг санагдаад."
[...Тэр үүнийг "тусгай эд зүйл" гэдгийг гадарлачихсан юм болов уу?]
Яах вэ, яасан ч яах вэ. Энэ бол аймшгийн түүхтэй таарах нь энгийн л үзэгдэл болсон ертөнц. Хэн нэгэн өөрөө ч мэдэлгүй ер бусын эд зүйл биедээ авч явна гэдэг тийм ч гайхаад байх зүйл биш...
Энэ бол ердөө л өдөр тутмын жижигхэн эд зүйл.
"Авч явахад амархан харагдаж байна. Дажгүй тохирох шинжтэй шүү."
Би дээд албан тушаалтнуудынхаа урамшуулсан үгийг сонсонгоо сканнердаж дуусгав.
[Ургамлын мэдээлэл хадгалагдлаа]
"Өө, одоо хамгийн сүүлийн шат үлдлээ."
[Цэцэрлэгчийн мэдээллийг оруулна уу]
Тийм болохоор л "хувийн зориулалтын тоног төхөөрөмж" гэж нэрлэдэг байх нь.
Ямар нөлөө үзүүлэхийг нь мэдэхгүй ч, ургамлыг арчлах "цэцэрлэгч"-ийн генетикийн мэдээлэл шаардлагатай бололтой.
[Энэ шат нь олон янзын хүчин зүйлээс хамаарч өөр өөр нөлөө үзүүлдэг бололтой.]
Эргэлзэж тээнэгэлзсэн ч би сканнерыг дуусгав.
[Мэдээлэл баталгаажлаа]
[Генетикийн мэдээллийг нэгтгэж байна]
Араат хүрднүүд харжигнан эргэх чимээтэй хамт машинаас өнгө бүрийн утаа савсаж гарлаа.
Машины урд талын шургуулга нээгдэж, дотор нь нэгэн жижиг зүйл харагдав.
Энэ нь тоглоомын төвд ашигладаг тоглоомон зоос шиг харагдаж байв. Гялалзсан гадаргуугийнх нь урд талд бээлийний дүрс сийлэгджээ.
Би болгоомжтойгоор гар сунган нөгөө эд зүйлийг авлаа.
Энэ бол миний анхны хувийн зориулалтын тоног төхөөрөмж байв.
Үүний дараа би шууд компанийн дотуур байр руугаа буцлаа.
Дээд албан тушаалтнууд маань ч "Сайн амраад, маргааш уулзацгаая" гэж хэлээд явав.
Тэд намайг Darkness-ээс дөнгөж гарч ирээд биеэ нөхөн сэргээж байхад тоног төхөөрөмжийн чадварыг турших гэх мэт тэнэг үйлдэл хийлгэж туйлдуулахыг хүсээгүй бололтой.
Би орон дээрээ сууж байгаад хоёр зоосоо хоёуланг нь гаргаж ирэв.
Нэг нь "эх ургамал" болгон ашигласан Мөнгөн Могойн Зоос.
Нөгөөх нь Мөнгөн Могой болон Тасгийн даргын цөцгийн тосны хутгийг нийлүүлж хийсэн саарал зоос байлаа.
Бүх зүйл сайхан байв. Гэхдээ...
"…Энийг яаж идэвхжүүлэх юм бол?"
Огт хөдлөхгүй байлаа.
[Бодоод байхад, Мөнгөн Могойн Зоос ч гэсэн тодорхой заасан ер бусын хүч чадалтай эд зүйл байгаагүй шүү дээ.]
Яг л мөнгөн тэмдэгт болгон ашиглах ёстой юм шиг харагдах энэ тоглоомон зоос үнэхээр миний авсан тоног төхөөрөмж мөн гэж үү? Дух руу хөлс чийхарч эхлэв.
Азаар миний санаа зоволт удалгүй замхарлаа.
Би нэгэн классик үйлдэл туршиж үзэв.
Би зоосыг эрхий хуруугаараа нясалж дээш шидлээ.
Яг тэр агшинд зоосны урд сийлээстэй байсан бээлийний дүрс сугарч гарч ирээд, бодит болчихлоо.
Агаарт хагас тунгалаг мөнгөлөг бээлий гарч ирэв.
Бээлий яг л пантомим хийж байгаа юм шиг хөдөлж, агаарт ямар нэг юм бичиж гарлаа.
...Зоос нэхээд байгаа юм уу?
Би хэтэвчээ ухаж 100 воны зоос гаргаж ирээд бээлийнд санал болгов.
Гэвч бээлий үүнийг голоод түлхчихэв.
Өөр мөнгөн тэмдэгт шаардаж байгаа юм болов уу? Эсвэл...
Би 500 воны зоос өглөө.
Гар зоосыг баяртайгаар хүлээн авч, хуруунуудынхаа хооронд хавчуулан, шидэт дохиогоор ор сураггүй алга болов.
[Мөнгөний дүнд нь байсан юм уу?]
Энэ тоног төхөөрөмж чанд капиталист логикоор ажилладаг юм байна.
Намайг итгэж ядан ширтэх зуур хагас тунгалаг бээлий миний гар руу хөвөн ирж, яг л өмсөж байгаа юм шиг уусан нэгдэв.
Надад хачин сонин мэдрэмж төрлөө.
Миний өмнө гарны минь сүүдэр шиг тусгал гарч ирэв.
Энэ нь миний хүссэнээр хөдөлж байлаа.
Би хана түлхэж, ариун цэврийн өрөөний хаалгыг нээж, бүр юм бичиж ч чадаж байв.
[Хүч чадал болон нарийвчлал нь... минийхтэй яг адилхан юм байна.]
Товчхондоо, хэрэв би үүнд зоос өгвөл хэдэн секундын турш хөдөлж чадах телекинетик гуравдагч гар болдог байх нь.
Хүрэх зайн хязгаар нь барагцаалбал... 3 метр орчим.
"500 воноор 5 секунд авч байгаа бол муугүй л юм."
Удалгүй сүүдрэн гар алга болж, хагас тунгалаг бээлий миний гараас зөөлөн мултран салав.
Надтай салах ёс хийж байгаа юм шиг даллаад, зоосны урд талд буцаад сийлэгдэн үлдэв.
Энэ бол Тасгийн даргын цөцгийн тосны хутга шиг аймшгийн түүх болон бодит байдлын хоорондох орон зайн хязгаарлалтыг даван туулдаг хэрэгсэл биш юм.
Гэхдээ оронд нь, аймшгийн түүх доторх миний үйл ажиллагааны хүрээг тэлж, нэлээд олон талт хэрэглээтэй мэт санагдав.
Мэдээж хослолынхоо халаасанд гүйж явахдаа хэдэн ширхэг 500 воны зоос авч явж чадах вэ гэдэг хязгаарлалт байгаа л даа...
[Ямартай ч энэ бол амжилттай сугалаа боллоо.]
Зоос нь ер бусын эд зүйл гэдгээ илчлэлгүй, зүгээр л энгийн мэт уусан үлдсэнд би баяртай байв.
"Миний оруулсан 1,000 онооны төлөө сайн ажиллаарай даа."
Би зоосыг бусад эд зүйлсийнхээ хамт халаасандаа хийв.
Дашрамд нь би дууссан "Smiley Sticker"-ээ нөхөж аваад, өөр нэг "Лааз" шүүрэн авлаа.
[Хүн үнэхээр л дасан зохицохдоо гаргууд амьтан юм даа.]
Би орон дээрээ хэвтлээ.
Хачирхалтай нь, миний сэтгэл санаа нэлээд дажгүй байв.
Нүдээ анихад нөгөө аймшигт ток шоуны дүр зураг тодхон сэргэж байсан ч, гэрлээ асаасан байхад арай гэж унтаж чадахаар байлаа.
Нөхцөл байдал сайхнаар төгссөн болоод ч тэр үү.
[...Надад бас нэлээд сайн аз байжээ.]
Багийн хуваарилалт маань ч гэсэн сайн таарсан.
[Нэг дор ийм их оноо авчихсан болохоор ч юм уу, бүх зүйл нэг л аятайхан санагдаад байна...]
Нойр хүрч эхлэн, би нүдээ алгуурхан анивчлав.
Гэвч нөгөө талдаа, Хүслийн тасалбарт зориулж цуглуулах оноо уул шиг овоорсон хэвээр байгаа бөгөөд хэдэн аймшгийн түүхийг даван туулах шаардлагатайг би огт мэдэхгүй байлаа.
Тэгсэн ч гэсэн анх удаагаа би энэ бүхнийг давж гарч, амьд үлдэж чадах юм шиг санагдав.
[Би магадгүй чимээгүйхэн тэсээд байж чадах юм шиг байна.]
...Энэхүү гэнэн тооцоолол маань маргааш нь ажилдаа ирээд, компанийн зарлалыг харах хүртэл л үргэлжилсэн юм.
[Хөөх! Ажилд орсноос хойш хоёр дахь өдрөө шинэ ажилтан A-зэрэглэлийн хямралыг даван туулав!]
"Бор гөрөөс өө, суу даа. Бид хоёр... үгүй ээ, чиний албан тушаал тун удахгүй өөрчлөгдөх бололтой."
Би энд чинь ажилд ороод ердөө гуравхан хонож байхад уу?