365-р бүлэг : Ирээдүйтэй залуу

Мастер Жет түүн рүү хэсэг харснаа инээмсэглэв.

"Төгс байна. Ялангуяа бидэн шиг хүмүүсийн хувьд ийм зорилготой байх нь сайн."

Тэр цайнаасаа балгаад, хэдэн хором нүдээ анив.

"...За. Хүчтэй болох олон арга бий. Зарим нь бусдаасаа илүү шулуун замтай. Хамгийн тохиромжтой нь хүчирхэг байгууллагын дэмжлэгтэй байх. Гэхдээ энэ ганцхан сонголт биш. Үнэндээ ийм хамтын ажиллагаа хоёр иртэй сэлэмтэй адил. Чи маш ихийг олж авна, гэхдээ хариуд нь бас ихийг өгөх хэрэгтэй болдог. Би чамд үндсэн мэдээллийг өгье. Харин шийдвэрээ чи өөрөө гарга."

Санни суудлаа бага зэрэг засаж, анхааралтай чагнав. Мастер Жет хэдэн хором бодсоны эцэст хэлэв.

"Ойрын хэдэн хоногийн дотор чи аль Цайз руу явахаа шийдэх хэрэгтэй болно. Энэ нь аль нэг бүлэглэлд нэгдэнэ гэсэн үг биш ч түүнтэй маш нягт холбоотой. Ихэвчлэн залуу Сэрэгчид хүссэн бүлэглэлдээ элсэх эрхийн төлөө өрсөлдөж, улмаар тухайн бүлэглэлийн хяналтад байдаг Цайз руу очдог. Харин чиний хувьд байдал өөр. Бүгд чамайг хүсэж байгаа. Би үнэхээр бүгд гэж дэлхий ертөнцийг хэлж байна. Тиймээс чи Зүүдний ертөнц дэх хүмүүсийн аль ч Цайзыг өөрийн гэр шигээ сонгож болно."

Тэр түр азнаж, эвшээгээд үргэлжлүүлэв.

"Чиний мэдэж байгаачлан Зүүдний ертөнцөд хүмүүсийн гурван том Цайз, мөн олон жижиг Цайз бий. Гол Цайзууд нь агуу овгуудын мэдэлд байдаг бол жижиг Цайзуудыг бага овог захирдаг эсвэл бие даасан байдаг. Гэхдээ бүгд гурван үндсэн хүний сууринг тойрон байрлаж, тэдэнтэй ямар нэгэн байдлаар холбоотой. Чи хаашаа ч явсан агуу овгуудын аль нэгний нөлөөний хүрээнд орно. Зөвхөн яг төвд нь байх уу, төвдөө ойр байх уу, эсвэл зах хязгаарт нь байх уу гэдэг л ялгаатай."

Санни толгойгоо маажив.

"Тэгвэл Засгийн газар яах вэ? Засгийн газар тэр олон Цайзыг удирддаггүй юм уу?"

Мастер Жет толгой сэгсрэв.

"Зүүдний ертөнцөд Засгийн газрын нөлөө том овгуудаас бага. Гэхдээ бид чухал бүх Цайзад өөрсдийн төлөөлөлтэй байдаг. Ингэснээр бид онцгой үүрэг гүйцэтгэдэг. Зүүдний ертөнцөд бид... тэр гурван хүчний хоорондын холбогч эд нь болдог гэж хэлж болно. Миний бодлоор ийм уян хатан байдал өөрийн гэсэн давуу талтай."

Тэр ширээг хуруугаараа зөөлөн тогшоод хэлэв.

"Ямар ч байсан, чи том Цайзуудын аль нэгэнд суурьших тодорхой сонголтоос татгалзсан ч гэсэн гурван нутаг дэвсгэрийн нэгийг сонгох хэрэгтэй болно. Зарим хүмүүсийн боддог шиг тэд хоорондоо холбоотой биш. Үнэндээ хүмүүсийн эзэмшлийн эдгээр нутгийг хооронд нь үхлийн аюултай, туйлын осолтой бүсүүд тусгаарладаг. Тиймээс хамгийн эхний шийдвэр чинь аль нутаг дэвсгэрийг сонгох вэ гэдэг байх болно."

Энэ нь утга учиртай байлаа. Жишээлбэл, Санни Бэхлэлт рүү явахаар шийдвэл түүнийг захирдаг агуу Валор овог эсвэл тэдний нөлөөний хүрээн дэх бага овгуудтай харилцаа тогтоох боломжтой болно. Харин Сон овог болон өөр хүний нутаг дэвсгэрт байдаг бусад овгуудад элсэх боломжоо алдана. Бусад тохиолдол ч мөн адил.

Мастер Жет цайгаа дуусгаад хоосон аягаа бодлогоширсон төрхөөр ширтэв.

"Өө, тийм. Энэ хэсэг дээр би чамд элсүүлэх илтгэлээ тавьж, Засгийн газрын хүчинд нэгдэхийг ятгах ёстой байсан юм. Гэхдээ тэгэхгүй. Чи энэ замын давуу болон сул талыг өөрөө ойлгох хангалттай ухаантай. Миний хэлэх ганц зүйл бол Өв залгамжлагч овгуудын гишүүд чамайг хэзээ ч өөртэйгөө эн тэнцүү гэж үнэхээр хүлээн зөвшөөрөхгүй. SS тэмдэглэгээтэй байсан ч бай, үгүй ч бай. Магадгүй нүүрэн дээр чинь хэлэхгүй. Гэхдээ хамгийн сайндаа л чамайг үргэлж... арай доогуур хүн гэж үзнэ."

Саннигийн царай барайв. Кастерын үл тоосон харцаар дүүрэн царай гэнэт санаанд нь орж ирэв.

Бардам язгууртан түүнийг юу гэж дуудсан билээ...

Монгрел? (Эрлийз нохой гэсэн үг)

'...Тэгээд тэр Монгрел чинь хоолойг чинь хэрчсэн. Одоо хэн нь инээж байгаа юм?'

Мастер Жетийн нүүрэнд ч бас төстэй илэрхийлэл тодорч байлаа. Магадгүй тэр ч гэсэн дорд гарал үүслээсээ болж өөрийн гэсэн бэрхшээлийг туулсан байх. Тийм байх магадлал өндөр.

Санни Мастер Жет Дэвшсэн болох хүртлээ ямар зам туулсныг төсөөлөн бодож суутал тэр санаа алдаад ёжтойхон инээмсэглэв.

"Гэхдээ Өв залгамжлагч овогт элсэх нь муу наймаа гэсэн үг биш шүү. Үнэндээ энэ бол олон хүний, бараг ихэнхийн мөрөөдөл. Чиний нэр хүндийг бодоход ямар ч овог чамайг ивээлдээ авахдаа баяртай байх болно. Зарим нь бүр чамайг өргөж авч ч мэднэ. Бүр... царай төрхийг чинь бодвол гэрлэлт ч боломжгүй зүйл биш!"

Санни гэнэт цайгаа буруу хоолойгоороо залгиж, бүр амаараа гарган шүршчихэв. Мастер Жет чангаар инээлээ.

"Гэрлэлт гэнэ ээ... ямар гэрлэлт?"

Тэр толгой сэгсрэв.

"Өв залгамжлагч овгууд авьяастнуудыг яаж элсүүлдэг гэж бодож байна? Ивээлд авах гэрээ бий, өргөмөл болгох нь ч бий, бас гэрлэлт бий. Үнэхээр үнэт хүмүүсийн хувьд хамгийн дуртай арга нь сүүлийнх. Цусан удмаа сайжруулахын төлөө шүү дээ."

Санни том нүдээ бүлтийлгэн түүн рүү ширтэхэд Мастер Жет инээд алдан үргэлжлүүлэв.

"Ямар ч байсан эдгээр нь чиний сонголтууд. Чи Засгийн газар, гурван агуу овгийн аль нэг, эсвэл бага овгийн аль нэгийг сонгож болно. Тэд бүгд чамайг бусдаас өөрсдийгөө сонгохыг ятгахын тулд хангалттай их зүйл санал болгоно. Хамгийн баян бүлэглэлүүд бүр чамайг сүнсний хэлтэрхийгээр булна. Тэр ямар үнэ цэнтэйг чи бид хоёр хоёулаа мэднэ. Ийм саналаас татгалзаж чаддаг хүн цөөхөн."

Тэр гунигтайхан санаа алдаж, хэсэг чимээгүй суугаад нэмж хэлэв.

"Мэдээж чи бас бие даасан хэвээр үлдэж болно. Тэр тохиолдолд өндөр үнэлэгддэг Сэрэгчийн ердийн давуу талуудаас өөр онцгой дэмжлэг авахгүй. Сургалт, нөөц боломж, эрх зэрэг бүх зүйл дээр. Харин нөгөө талаар ямар ч үүрэг хариуцлагад хүлэгдэхгүй. Зүүдний ертөнцөөр хүссэнээрээ аялж, Хар дарсан зүүдний мангасуудыг агнаж эсвэл сонгосон Цайздаа хэрэгтэй үйлчилгээ үзүүлэн амьдралаа залгуулж болно. Ийм бие даасан Сэрэгч олон байдаг. Гэхдээ үнэхээр амжилтад хүрсэн нь тун цөөхөн. Амаргүй амьдрал даа."

Санни нүүрээ илэн, өмнө нь дэлгэгдсэн сонголтуудын элбэг дэлбэгээс болж бага зэрэг дарамт мэдрэв.

Түүнд сүнсний хэлтэрхий хэрэггүй байсан ч түүгээр булуулах нь бас л сайхан туршлага мэт санагдаж байлаа.

Мастер Жет инээмсэглэв.

"Тэгээд? Юу гэж бодож байна?"

Тэр хэсэг эргэлзээд хэлэв.

"Мэдэхгүй л юм. Нэг дор дэндүү их мэдээлэл байна. Шийдвэр гаргахаасаа өмнө... олон зүйлийг бодож үзэх хэрэгтэй."

Тэр яг ийм хариулт хүлээж байсан мэт толгой дохив.

"Сайн байна. Ийм асуудлыг яарч шийдвэл сайн зүйл болохгүй нь тодорхой."

Ингээд Мастер Жет халааснаасаа жижигхэн, битүүмжилсэн хуванцар сав гаргаж ирээд Санни руу түлхэв. Санни түүнийг аваад хөмсгөө өргөлөө.

"Энэ юу вэ?"

Тэр мөрөө хавчив.

"Цэргийн зориулалттай сэргээш. Хэсэг хугацаанд сэрүүн байхад чинь тусална. Нэг удаад нэгээс илүү наалт хэрэглэж болохгүй... байз, би яагаад үүнийг чамд тайлбарлаад байгаа юм бэ? Чи захын дүүргээс ирсэн болохоор сэргээш хэрэглэх тал дээр хангалттай туршлагатай байлгүй. Ямар ч байсан үүнийг хэрэглэвэл долоо хоног орчим ухаан санаа чинь бүрэн саруул байна. Шийдвэрээ гаргачхаад надтай холбоо бариарай. Үлдсэнийг нь би зохицуулна. Өө, бас асуух зүйл гарвал залгаарай... үгүй ээ, ямар ч хамаагүй асуулт биш. Зөвхөн чухал асуулт."

Тэр босож, биеэ бага зэрэг сунгаад Санни руу үл ялиг инээмсэглэв.

"За... чамтай уулзсандаа таатай байлаа, Сэрэгч Санлесс. Чи сайн байлаа. Тэндээс амьд гарч чадсан. Бидний бас нэг нь амьд үлдсэнийг мэдэхээр сэтгэл дулаацдаг юм. За ингээд явлаа. Цаг хэнийг ч хүлээдэггүй шүү дээ."

Тэр эргэн алхах гэж байтал Санни түүнийг зогсоов.

"Нээрээ... Мастер Жет?"

Тэр гайхсан янзтай эргэж харав.

"Юу?"

Санни хэсэг тээнэгэлзсэний эцэст шинэхэн, үнэтэй, гоёмсог Холбооны хэрэгслээ өргөв.

"Надад... таны холбоо барих хаяг байхгүй."

Мастер Жет түүн рүү хэсэг ширтээд инээмсэглэв.

"Миний дугаарыг авах гээд байгаа юм уу?"

Чих нь үл ялиг халуу шатаж эхэлснийг мэдэрсэн Санни ханиалгаад өөрийгөө барин, тайван инээмсэглэлээр хэлэв.

"Тийм ээ. Үгүй бол шийдвэрээ гаргачхаад тантай яаж холбоо барих вэ дээ?"

Үзэсгэлэнт Дэвшсэн эмэгтэй толгой сэгсрээд түүний Холбооны хэрэгслийг авч, өөрийн мэдээллийг оруулав.

Төхөөрөмжийг нь буцаан өгөөд түүн рүү харан хэлэв.

"...Чамаас мэдээ ирэхийг хүлээж байя, Сэрэгч Санлесс. Дараа уулзъя."

Ингээд Мастер Жет холдон одож, Санни ширээний ард ганцаараа үлдэв.

Эргэн тойрноо ажиглаад тэр хэсэг чимээгүй суулаа.

Эцэст нь намуухан дуугаар хэлэв.

"Сонин юм... сая идсэн бүхнээсээ дахиад нэг порц авч болох болов уу? Үнэхээр таатай байхсан..."