542-р бүлэг : Эелдэг, ухаалаг онлайн хэлэлцүүлэг

Санни энэ гурван тулаанаас өгөөмөр шагнал хүртсэн... ядаж хоёроос нь бол.

Нэг нь хоёрдугаар түвшний Дэвшсэн Дурсамж байсан бөгөөд сум байлаа. Нөгөө нь хоёрдугаар түвшний Дэвшсэн бамбай байв. Хоёулаа маш сайн шидийн сайжруулалттай байсан ч тэдгээрийг нарийвчлан судлах зав түүнд байсангүй. Түүний тогтоож амжсан цорын ганц зүйл нь эдгээр Дурсамж Чулуун Гэгээнтэнд тэжээл болгоход хэтэрхий үнэ цэнтэй байлаа.

Харин гурав дахь шагнал нь... гашуун урам хугаралт байв. Үнэндээ бусад хэний ч хувьд гайхалтай шагнал болох байсан. Бүр зуун сүнсний хэлтэрхий шүү дээ! Сэрүүн ертөнцөд энэ бол маш үнэтэй нөөц байлаа. Өв залгамжлагчийн жижиг овгууд хүртэл ийм хэмжээг үл тоомсорлохгүй.

Гэвч Санни түүнийг авч чадахгүй тул түүнд юу ч үлдсэнгүй.

'Хараал ид гэж...'

Гэсэн ч түүний урам хугаралт удаан үргэлжилсэнгүй. Эцсийн эцэст энэ тийм ч чухал биш байлаа. Жинхэнэ шагнал бол хоёрдугаар болон нэгдүгээр байр эзэлсэн хүмүүсийн хүртэх зүйл байсан бөгөөд Санни аль хэдийн финалын тулаанд байр сууриа баталгаажуулчихсан байв.

Ялагч болон дэд байрын эзэн Валор овгийн хувийн зэвсгийн сангаас Дурсамж хүртэх байлаа. Энэ бол Сэрэгч бүрийн хүсдэг зүйл байсан. Учир нь Агуу овог зөвхөн хүлэгт баатруудаараа алдартай биш юм.

Тэд бас дархчуудаараа алдартай.

Валорын гэр бүлийн гишүүд ихэвчлэн дархан урлал, бүтээлтэй холбоотой Аспект авдаг байв. Тэдний зарим нь бүр Хар дарсан зүүдний мангасыг устгаж, Зүүдний ертөнцийн аюултай уудам нутгийг туулахад зориулагдсан Дурсамжийг захиалгаар бүтээж чаддаг байлаа. Санни тэд олон нийтийн тэмцээний шагналд үнэхээр онцгой зүйл тавина гэдэгт эргэлзэж байсан ч тэдний сан дахь юу ч байсан үнэ цэнтэй байх нь гарцаагүй.

Түүнээс гадна тэр Сүүдрийн Бүжгийг эзэмших чадвараа ч нэлээд ахиулсан байлаа. Ялангуяа сүүлийн гурван тулаан түүнийг хоёр дахь алхмыг нь ойлгоход бүр ч ойртуулжээ. Одоо түүнд тэр нь бараг гар хүрэх зайд байгаа мэт санагдаж байв.

Тиймээс энэ тэмцээнд оролцсон нь эцсийн эцэст нэлээд зөв санаа болжээ.

'Үнэхээр Рэйнд талархах ёстой юм байна... үгүй, байз... тэр намайг оролцож байгааг мэдэхгүй шүү дээ. Бас энэ тэмцээнд би биш... Монгрел оролцож байгаа! Хараал ид, яагаад бүх зүйл ингэж ээдрээтэй байдаг юм бэ... Би жаахан амрах хэрэгтэй.'

Дайнисортой хийсэн тулааны дараа тэр хамгийн сайн байдалдаа байсангүй. Тэр тулаан үнэхээр харгис байсан. Ер нь харгис тулаанд дуртай Санни хүртэл тийм хэмжээнд хүрнэ гэж бодоогүй байлаа. Тулаан дуусмагц шарх нь бүрэн эдгэрсэн ч оюун санааны ядаргаа үлджээ. Мөн Зүүдний Орон ингэж ажилладаг тул түүний мөн чанар ч бараг шавхагдсан байв.

Аз болж тэмцээнийг зохион байгуулагчид финалын тулааныг шууд товлоогүй хангалттай ухаантай хүмүүс байлаа. Эхлээд гурав, дөрөвдүгээр байрны төлөөх тулаан, мөн хэд хэдэн үзүүлбэр болох байв. Түүнд амарч, сэргэхэд хэдэн цагийн хугацаа байсан.

Ядрангуй санаа алдан Санни Зүүдний Ороноос гарч, капсулаасаа гарч ирээд өөртөө амттай оройн хоол хийхээр явлаа.

---

Хоол идэж байхдаа Санни өрсөлдөгчөө судлав.

Энэ жилийн финал арай өвөрмөц болох байлаа. Учир нь хоёр тулаанч хоёулаа тэмцээний шагналын төлөө Зүүдний Оронд шинээр орж ирсэн хүчирхэг хүмүүс биш, харин байнгын тулаанчид байсан юм. Ядаж Монгрелийг тийм гэж тооцож болох юм бол.

Тэр тулалдах гэж буй эмэгтэйн тухай ч бас сонсож байсан ч төдийлөн ихийг мэддэггүй байв.

Түүний хоч нь Хатан Зөгий бөгөөд Саннигийн нэгэн адил бараг л нууцлаг нэгэн байлаа. Бусад алдартай тулаанчдаас ялгаатай нь тэр тулаанаа шууд дамжуулдаггүй, сурталчилдаггүй, харин нэрээ нууцалж, олны анхаарлаас хол байхыг илүүд үздэг байв. Тэр зөвхөн тулаанд л сонирхолтой болохоос өөр зүйлд огт анхаардаггүй юм шиг санагдана. Саннигийн мэдэхээр Хатан Зөгий нэг ч удаа ялагдаж байгаагүй. Тэр тулааны талбайн ялагдашгүй аварга байлаа.

Тийм хүчтэй хүн яагаад хийсвэр тоглоомд цаг үрнэ гэж? Түүнд ямар ч ойлголт байсангүй. Гэхдээ өөрөө ч хийх илүү чухал зүйлтэй атлаа энд цаг үрж байсан болохоор Санни түүнийг шүүх хүн биш байв. Түүнд өөрийн гэсэн шалтгаан байсан. Магадгүй түүнд ч бас байсан байх.

Эсвэл зүгээр л хөгжилтэй хобби нь байсан ч юм билүү.

Ямар ч байсан интернет Хатан Зөгий хэн байж болох тухай таамгаар дүүрэн байлаа. Тэр ч бүү хэл түүнийг ерөөсөө хүн биш, харин тоглогчдыг оргилд хүргэхгүй байж, үргэлж илүү өндөр түвшний ур чадварт тэмүүлэхийг сануулахын тулд бүтээгдсэн хиймэл оюун ухаан, бот гэсэн цуурхал хүртэл байв. Мэдээж энэ бол туйлын тэнэг яриа. Учир нь Зүүдний Орон жинхэнэ оюун ухааныг дуурайлган бүтээх чадваргүй.

Хэрэв чаддаг байсан бол Сэрэгсэд хоорондоо тулалдаж цагаа үрэхгүй, харин дуурайлган бүтээсэн Хар дарсан зүүдний мангасуудтай тулалдаж бэлтгэл хийх байсан.

Гэхдээ хүмүүс итгэхийг хүссэн зүйлдээ л итгэдэг...

Бас хүмүүс галзуурчихсан байдаг!

'Юу болоод байна аа...'

Санни хачин царайлан Холбооны хэрэгслийнхээ дэлгэцийг ширтэв.

Огт гайхах зүйлгүйгээр Хатан Зөгий ч бас өөрийн хүсээгүй шүтэн бишрэгчдийн армитай байжээ. Одоо тэр арми Монгрелийн мөн өөрийн хүсээгүй дагагчдын сүрэгтэй бүх нийтийн дайн хийж байв. Интернет хоёр талын хорсол, доромжлолоор дүүрчээ.

"Монгрел Эзэнтэн гэж тэр азгүй амьтан уу? Птү! Түүнийг Монгрел Хаантан болоход нь хүрээд ир, мэдрэмжгүй мангаруудаа!"

"Тэнэг минь! Монгрел хэзээ ч өөрийгөө эзэн гэж хэлж байгаагүй, бас хаан болохыг ч хүсэхгүй! Монгрел бол бидний нэг, жирийн хүмүүсийн төлөөлөл! Дарангуй хааныг дагахыг хүсвэл ганцаараа дага, хонины хошного минь!"

"Хэнийг хонины юу гээд байгаа юм, хонь минь?! Тэр сэжигтэй Монгрел чинь жинхэнэ эвэртэй шүү дээ. Майлахаасаа өмнө жаахан бод!"

"Залуусаа, тайвширч болохгүй юу? Бид яагаад маргалдаад байгаа юм? Монгрел чинь Хатан Зөгий ӨӨРӨӨ гэдэг нь ойлгомжтой биш гэж үү? Нэг хүн! Тулаан ч болохгүй!"

"Тэр нөхөр галзуурчихаж! Монгрел манай эрхэм Хатангийн зүүн гарын чигчий хуруутай ч зүйрлэшгүй!"

"Энэ нөхөр солиотой юм байна! Тэр өрөвдөлтэй гүнж болох гэсэн амьтан эрхэм Монгрел эзэнтэй яаж зэрэгцэх юм бэ? Инээдтэй юм!"

"...Ядаж өмнөх сэтгэгдэл бичсэн хүн тэнэг гэдэг дээр бид санал нийлж байх шиг байна."

"Тэнэг нь чи!"

"...Үгүй ч юм шиг."

Санни нүд нь татвалзан дэлгэц рүү ширтсээр байлаа.

Хэсэг хугацааны дараа тэр нүүрээ буруулав.

'Хүн төрөлхтөн бол алдаа. Магадгүй өөр зүйлд боломж олгох цаг болсон байх... Мөөгнүүд дажгүй төрөл зүйл юм шиг санагддаг...'

Холбооны хэрэгслээ унтраасан Санни бүх анхаарлаа хоолоо идэхэд төвлөрүүлэв. Тэр бүх тэнэглэл бараг л хоолны дуршлыг нь алчих шахсан байлаа.

Гэхдээ Саннигийн хоолны дуршил өөрийнх нь адил маш тэсвэртэй байсан. Бүр түүнээс ч илүү байж мэднэ. Үүнийг үгүй хийх бараг боломжгүй байлаа.

---

Хэдэн цагийн дараа Санни дахин тулааны талбайд ирэв.

Энэ үзүүлбэрээ дуусгаж, шагналаа хураах цаг болжээ.

Гэхдээ... эхлээд тэр хамгийн хүчтэй өрсөлдөгчөө ялах хэрэгтэй.

'Зүгээр дээ... Ямар ч байсан гоё Дурсамж авна...'

Гэхдээ ялбал бүр ч дээр.

...Түүнийг гарч ирмэгц үзэгчид нижигнэтэл алга ташин уухайллаа.