490-р бүлэг : Шантралын Цэг

Зургаан минут.

Байдал муугаас бүр аймшигтай болох хүртэл Санни тэсэж чадсан хугацаа ердөө тэр байлаа.

Тэр үед Хаалганы өмнөх газар овоорсон цогцсоор хучигдаж, тэдний цус чулуун замаар час улаан горхи мэт урсан байв. Тэр хэчнээн идэвхгүй жигшүүрт амьтдыг хөнөөж, хэчнээн эртний анчдыг тас цавчсанаа аль хэдийнээ тоолохоо больжээ. Эртний сүнснүүд хэчнээн хүчирхэг, аймшигтай байсан ч тэдний дайралт түүний илд, Аспект, хүсэл зоригийн нэвтэршгүй хаалтад бутран унаж байлаа.

Гэвч Санни үүнийхээ төлөөсийг төлж байв.

Одоо булчингууд нь шатаж, тэр ядарч туйлдсан уушгиндаа агаарыг хүчээр оруулж гаргах хэрэгтэй болжээ. Доод ертөнцийн өмсгөл тэсэж байсан ч хар чулуун мэт металлын доорх бие нь нүдүүлж, няцлагдан хөхөрчээ. Хуяг өөрөө ч цусаар бүрхэгдэн, хэд хэдэн газраа үл ялиг хонхойсон байв.

Гэхдээ тэр хонхойлтуудыг анчид үүсгээгүй.

Гурав дахь давалгааны үеэр Хаалганы харанхуйгаас шинэ Хар дарсан зүүдний мангасууд гарч ирсэн бөгөөд тэдний дунд Саннигийн хядаж байсан нохдуудаас ч илүү том, илүү аймшигтай араатнууд байлаа.

Мөн тэдний эзэд.

Нууцлаг Булшны чөтгөрүүд хатаж хорчийсон анчидтай төстэй ч хамаагүй өндөр, хүчтэй, илүү сайн зэвсэглэсэн байв. Тэд чадварлаг урласан цахиур зэвсэг барьж, өмхийрсөн арьс, ясаар хийсэн хуяг өмссөн бөгөөд хоосон нүдний хонхорууд нь өлсгөлөн улаан дөлөөр асаж байлаа.

Хамгийн муу нь тэд чулуун жад, сэлмээ хэрхэн хэрэглэхээ үнэхээр мэддэг байв.

Эртний чөтгөрүүдийн хачирхалтай, догшин, овжин хэрцгий тулааны арга барилтай тулгарсан Санни бүрэн самгардав. Энэ нь түүний урьд өмнө хэзээ ч мэдэрч байгаагүй зүйл байлаа. Тэд зальжин махчдын шулуун атлаа башир шийдэмгий зангаар, ямар ч аргаар хамаагүй алах хорон санаатайгаар, үргэлж хамгийн үр ашигтай бөгөөд хамгийн балмад хэрцгий замыг сонгон тулалддаг байв.

Ийм зүйл ажиллах ёсгүй байсан.

Гэвч ажиллаж байлаа.

Саннигийн хуяг дээрх хонхойлтууд үүний баталгаа байв.

Ер нь бол тэр гайхах ёсгүй байсан. Хэрэв эдгээр эртний сүнснүүд түүний дэлхийн балар эртний хүмүүстэй төстэй хүмүүсээс үүссэн бол тэд гарагийн хэмжээний сүйрэл тарьдаг, өршөөлгүй алуурчин махчид байсан юм.

Саннигийн түүхийн талаар мэддэг өчүүхэн мэдлэгээр бол балар эртний хүмүүс бүх дэлхийг тахал мэт бүрхэж, бүхэл бүтэн амьтдын төрөл зүйлүүдийг, тэр дундаа хүн төрөлхтний бусад шинээр үүсэж байсан бүх салбаруудыг нэгэн аймшигт давалгаагаар устгасан аж. Цахиур зэвсэг, галын мэдлэгийнхээ ачаар тэд жижигхэн биетэй, богинохон настай атлаа аварга солир, цаг уурын огцом өөрчлөлттэй эн зэрэгцэхүйц хэмжээнд зургаа дахь их мөхлийн шалтгаан, үйлдэгчид болсон байлаа.

...Тэр Хуягт Легионыг хүртэл бага зэрэг санаж эхэлжээ.

Ямартай ч Санни энэ аймшигтай дайчдын хэдийг нь боловч ямар нэгэн аргаар устгаж чадлаа. Үүгээр ч зогсохгүй тэр Сүүдрийн Бүжгийн мөн чанарын гүнд хүрч, тэдний балар эртний догшин тулааны арга барилын өчүүхэн бүх нарийн ширийнийг шуналтайгаар өөртөө шингээгээд, дараа нь Хар дарсан зүүдний мангасуудын давалгаанд эргүүлэн тусгаж, угаасаа аймшигтай байсан үхлийн бүжгээ үнэхээр жихүүдэс төрүүлэм харгис түвшинд хүргэв.

Цуст Сакура аль эрт хязгаартаа хүрчихсэн байлаа.

Минутууд өнгөрсөөр, Санни нүдүүлж, аюултайгаар туйлдан, Сүүдрийн Мөн Чанарын нөөц нь хурдацтай шавхагдаж байсан ч хэдхэн хормын турш тэр бүхнийг хяналтдаа байлгаж байгаа мэт санагдав.

Магадгүй... үнэхээр магадгүй... тэр бүтэн арван гурван минутын турш байрлалаа хамгаалж чадах ч юм шиг.

Тэгээд тэр ингэж чадахгүйгээ ойлгов.

Зургаа дахь минут дуусах мөчид хилэнт архираан дэлхийг донсолгож, асар том ямар нэгэн зүйл Хаалганы харанхуйгаас түүн рүү дайран ирэв. Түүний Хаалганы өмнө босгосон цогцсын хаалт дэлбэрч, Саннигаас хоёр дахин өндөр, дор хаяж хорь дахин хүнд аварга араатан цус, ясны хэлтэрхийн үүлэн дундаас гарч ирлээ. Хоёр хоосон нүдний хонхор нь сүнслэг улаан дөлөөр асаж байв.

Санни нүдээ том болгон түүн рүү ширтэв.

Тэр амьтан аварга бизон(bison)-той төстэй бөгөөд хар үс нь цоохортож өмхийрсөн, нурууных нь дагуу арьсыг нь нэвт сүлбэсэн урт час улаан ясан өргөснүүд цуварчээ. Мангасын толгойг цусаар будсан мэт шүдлэг хоёр эвэр титэмлэж байв.

'Нүгэлт... энэ чинь Нүгэлт байна!'

Бизон Саннигийн тулалдаж байсан ноход, том араатнуудаас бас нэг зүйлээрээ ялгаатай байлаа. Тэр эртний анчидтай адил өөрөө сүнс байв. Улаан дөлний хорон санаат сүнсээр дахин амилуулсан цогцос.

'Новш!'

Санни нэн даруй [Үнэний Өд]-д хуягаа аль болох хүнд болгохыг тушаагаад, тэр зүйл өөрийг нь нэвтэрч өнгөрөхийг огтхон ч зөвшөөрч болохгүйгээ сайн мэдэж байсан тул байрлалаа намсгав.

Дараагийн агшинд хоёр мянган килограмм өмхйрсөн мах, хурц эвэр түүнтэй бүх хурдаараа мөргөлдөв.

'Пи...'

Хормын төдийд бүх зүйл харанхуй болов.

...Дараа нь Санни асфальтан дээгүүр ойж, дараа нь аймшигтай хурдаар өнхөрсөөр, эцэст нь нэгэн барилгын хананд мөргөж түүнийг дэлбэлэн, цементийн хэлтэрхийг агаарт цацрууллаа.

'Сайн... биш... шүү'

Толгой нь эргэсэн тэрээр Нэхэгчийн Багийн доогуур цус урсан шүүрч байгааг мэдрэн толгойгоо сэгсэрч, дараа нь Сүнсний Могойн тусламжтайгаар босов. Тэгээд харааг нь бүрхсэн улаан манангийн цаадах Хаалга руу харав.

Асар том сүнс зургаан айж сандарсан Сэрэгч рүү ойртож байлаа. Гэвч хурд нь удаан, алхаа нь гуйвж байв.

Түүний духанд том нүх гарсан бөгөөд зузаан, адамантин гавлын яс нь хагарч бутран, цустай нухашны хэлтэрхий тэндээс асгарч газарт унаж байлаа.

Мөргөлдөхийн яг өмнөхөн Санни хуягласан нударгаа түүний толгой дээр буулган, эцсийн мөчид Сарны Хэлтэрхийг дуудсан байв.

Түүний төлөвлөгөө тэр том новшийн тархийг нэвт хатгах байсан ч мөргөлдөөний асар их хүч, хурднаас болж тэр үүнийг хийгээд зогсохгүй өргөстэй бээлийгээрээ духыг нь цөм цохиж нэвтэлжээ.

Саннигийн бодол удаан, замбараагүй байсан ч мэдрэхүй нь аль хэдийн сэргэж эхэлж байлаа.

'Тархиа доргиулчихсан байх...'

Зургаан Сэрэгчид хүрэх сүүлийн хэдэн метрийг туулж чадалгүй бизон зогсон ганхав. Дараа нь хөл нь гэнэт нугарч, газарт хүчтэй унахад хөрсөөр нэг доргилт тархлаа.

...Гэвч бизоны гаргасан цоорхойгоор жигшүүрт амьтдын үер аль хэдийн цутган орж ирж байв.

Саннигийн өмнө нь зогсож байсан хоосон зай руу.

Толгой нь эргэсэн хэвээр Санни ганхан зогсоод, дараа нь Сүнсний Могойг сулхан өргөв.

'Муу. Энэ үнэхээр, үнэхээр муу байна...'