406-р бүлэг : Мэдлэгт тулгуурласан таамаг

Хэдэн цагийн дараа Санни нүдээ өөрийн гараар ухаж гаргамаар санагдаж байлаа.

Рэйний сургууль дээр зааж буй хичээлүүд уйтгартайдаа биш, харин нэг өрөөнд бөөгнөрсөн эрх танхи хүүхдүүд бусдын юм сурах боломжийг аль болох хүндрүүлэн оршин байгааг харахаас залхсандаа.

Энэ нэр хүндтэй сургууль гаднаасаа мэдлэгийн газар мэт харагдавч үнэндээ тулааны талбар шиг байлаа. Сурагчдын дундах далд улс төр, тэдний бүрдүүлсэн олон бүлэглэлийн шаталсан бүтэц нь Гэрэлт Цайз дахь бүлэглэлүүдийн харгис тэмцлээс ч илүү ээдрээтэй бөгөөд тэдний ааш авираас харахад түүнээс дутахааргүй ширүүн байв.

...Гэхдээ үнэндээ тийм биш.

Энд хэний ч амь нас эрсдэхгүй. Хэн ч буруу алхам хийснийхээ төлөө цөлөгдөж, өлсөж үхэхгүй.

Энэ бүхэн ердөө нэр хүнд, бардамнал, байр суурийн төлөөх тэмцэл байлаа.

Үнэхээр утгагүй!

Гэхдээ Санни жаахан эргэцүүлээд үзэхэд тийм ч утгагүй биш байж магадгүйг ойлгов.

Ядаж тэдний хувьд.

Эдгээр хүүхдүүд асар их дарамтад орж, тоон үзүүлэлтээр үнэлэгдэн, хоорондоо өрсөлдөхөөс өөр аргагүй болсон. Үүний үр дүнд өрсөлдөгчдөө хүчтэй үзэн ядах сэтгэл өөрийн эрхгүй төрнө. Харин энэ тогтолцоо тэдний дотор суулгасан гүн айдас, өөртөө итгэх итгэлгүй байдал тэр үзэн ядалтыг улам лавшруулжээ.

Тэд яагаад хоорондоо байнга сөргөлддөг нь гайхах зүйл биш.

Энэ сургууль үнэндээ хүүхдүүдэд бодит ертөнцөд амьд үлдэж, амжилттай амьдрахад хэрэгтэй чадвар заахаас гадна Санни хэдхэн цагийн өмнө эргэцүүлж байсан тэр "зөөлөн" байдлыг нь устгах зорилготой ажээ.

Эцэст нь хамгийн шилдэг, хамгийн тэсвэртэй сурагчид хатуу ширүүн, гундсан хүмүүс болж үлдэнэ. Харин бусад нь зүгээр л эвдэрч хаягдана.

Дэндүү үрэлгэн, үр дүн нь ч эргэлзээтэй тогтолцоо.

Нам гүм кафед цайгаа шимэн суусан Санни толгой сэгсрэв.

'Баян хүмүүс ээ гэж...'

Аз болоход Рэйн ангийнхныхаа хорсол, атаархалд огт автаагүй бололтой. Тэр ангийнхаа арын эгнээнд тайван сууж, ямар ч хэрүүл маргаанд хутгалдалгүй, багш нарын заасан бүхнийг үнэнчээр сурч байлаа.

...Харин хичээлүүд нь гайхалтай бас сонирхолтой байв. Санни хүртэл энэ хэдэн цагийг үнэхээр таатай өнгөрөөж байгаагаа анзаарав. Одоогоор тулааны хичээл эхлэх болоогүй ч сургуулийн Зэрлэг Байгальд Амьд Үлдэхүй хичээлийг үзэж, Зүүдний ертөнцийг анх судалсан түүхийн тухай тун сонирхолтой лекц сонслоо. Мөн төрөл бүрийн Хар дарсан зүүдний мангас, тэдгээрийн биеийн бүтэц, чадвар, сул талын тухай хичээлийг ч үзэв.

Хэрэв Мартагдсан Эрэг дээр өнгөрүүлсэн эхний саруудад энэ бүгдийг мэддэг байсан бол...

Үнэнийг хэлэхэд төдийлөн өөрчлөгдөхгүй байсан байх.

Энэ бүхнийг хэчнээн сайн мэддэг байсан ч Нойрсогч хүнд тийм хэмжээний сорилтой нүүр тулах тавилан угаасаа байгаагүй.

Гэсэн ч түүнд бага зэрэг гуниг төрөхөөс өөр аргагүй байлаа. Хүүхэд байхдаа тэр энэ мэдлэгийн эрдэнэсээс бүрэн тусгаарлагдсан.

Хэрэв өөрөөр байсан бол түүний амьдрал ямар болох байсан бол?

Ядаж илүү сонирхолтой, илүү жаргалтай байх байсан.

Энэ үед тэр Рэйн хэр хэмжээний мэдлэгтэй, Хар дарсан зүүдний Хараалд хэр бэлтгэгдсэнийг ерөнхийд нь ойлгожээ.

Гэхдээ бодитоор хэр сайн тулаанд сургаж байгааг мэдээгүй хэвээр.

Үүнийг мэдэхийн тулд тулааны хичээлийг нь үзэх хэрэгтэй байлаа.

Удалгүй Санни бага зэрэг уйдав. Шидийн технологийн тухай лекцийг хагас сонссон болоод кафед эргэн тойрноо ажиглав.

Энэ цагт хүн цөөн байсан ч байдал хурдан өөрчлөгдөж байлаа. Ойролцоох барилгуудын оффисын ажилчид үдийн завсарлагадаа гарчээ. Сургуулийн ахлах ангийн сурагчид ч мөн адил.

Түүний ойролцоох хэд хэдэн ширээг хөгжилтэй хэсэг бүлэг сурагчид эзэлсэн тул тэдний ярианаас өөрийн эрхгүй хэсэг хэсгээр нь сонсов.

"Байхгүй ээ! Хэзээ нээлтээ хийх юм?"

"Магадгүй хоёр сарын дараа байх."

"Тэгвэл гол эмэгтэй дүрд хэн тоглох юм бол? Байз... би таая..."

Тэд удахгүй гарах киноны тухай ярилцаж, жүжигчдийн сонголтыг догдлон таамаглаж байлаа.

Яриа нь Саннид нэг л сонин санагдсан ч төдийлөн анхаарсангүй.

"...Үгүй. Жинхэнэ тулааны мастер хүний сэтгэлгээ яг ийм байдаг юм!"

"Үгүй дээ! Тэр тийм утгаар хэлээгүй. Ноён Монгрелийг чи хэн гэж бодоод байгаа юм, жирийн нэг амьтан гэж үү? Мэдээж биш! Тэр нийгмийн байр суурь, алдар нэрийг утгагүй зүйл гэж үздэг болохоор л тэгж хэлсэн. Жинхэнэ дайчны нүдэнд тийм юм ярих ч үнэ цэнгүй. Цорын ганц чухал зүйл бол хүч! Тийм болохоор л тэр язгууртан гарал үүслээ нууж байгаа юм."

Санни ширүүн маргалдаж буй хоёр залууг хэсэг ширтээд толгой сэгсрэв.

'Ямар хөгжилтэй юм бэ. Ийм давхцал гэж байдаг аа?'

Ямар ч байсан өөр газар өөртэй нь ижил хоч хэрэглэдэг хүн байдаг бололтой. Саннигийн сонссоноор тэр нөхөр бүр бүрэн тэнэг бөгөөд өөрийгөө "Ноён" гэж дуудан, мэргэн ухаантан дүр эсгэж, хүмүүст "жинхэнэ дайчин" байхыг заадаг аж.

'Яасан тэнэг амьтан бэ... гэхдээ гайхах зүйл алга. Ийм хочийг зориуд сонгох хүн угаасаа тэнэг л байх. Энэ нөхөрт яг ямар асуудал байгаа юм бол оо? Ямар нэг зүйл дээрээ асар их өөртөө итгэлгүй л байгаа байх...'

Гэвч удалгүй тэр анхаарлаа дахин Рэйн рүү төвлөрүүлэх хэрэгтэй болов. Учир нь Рэйн эцэст нь сургуулийн дожо руу явж байлаа.

Тулааны хичээл эхлэх гэж байсан юм.

Багш нь санаанд оромгүйгээр жинхэнэ Сэрэгч байв. Тэр гуч гаруй насны, сүрлэг биетэй, туршлагатай дайчны хүйтэн нүдтэй эр байлаа. Санни түүний Аспект юу болохыг хэлж чадахгүй байсан ч энэ хүн тулаанаас хол амьдарсан нэгэн биш гэдэг нь илт.

Рэйний багш бол жинхэнэ мэргэжилтэн байлаа.

Түүнд бодит ертөнцөд дахин хэзээ ч ажил хийх шаардлагагүй хэмжээний мөнгө лав байсан. Тийм байхад сургуульд хүүхдүүдэд хичээл зааж байгаа нь өөрийн зарчим эсвэл сурагчдын эцэг эхийн нэгэнд өгсөн амлалтаас болсон байх.

Ямартай ч Рэйнд энэ нь сайн хэрэг.

Дараагийн нэг цаг орчим Санни сурагчид төрөл бүрийн зэвсгээр бэлтгэл хийж, хоорондоо тулалдахыг ажиглав. Эхэндээ хуурамч зэвсэг хэрэглэнэ гэж бодсон ч Сэрэгч багш хүүхдүүдийг хүнд хамгаалалтын хэрэгсэл өмсүүлээд, үзүүр ирийг нь мохоосон ч жинхэнэ зэвсэг бариулахыг шаарджээ.

'Зөв арга байна даа.'

Рэйний түвшин...

Түүний бодож байснаас хавьгүй дээр байлаа. Мэдээж Кастер эсвэл Нефисийн хэмжээнд хүрэхгүй.

Гэхдээ Санни өөрөө тэр насандаа ийм байж чадахгүй байсан нь гарцаагүй.

Рэйн хурдан, шаламгай, ухаалаг байв. Өрсөлдөгчийнхөө гаргасан өчүүхэн алдаа бүрийг бүрэн ашиглаж чадаж байв.

Тэр холын зайны тулааныг илүүд үздэг бололтой. Гэхдээ урт жаднаас эхлээд хөнгөн сэлэм хүртэл олон төрлийн зэвсэг ашиглан ойрын тулаанд ч өөрийгөө бүрэн хамгаалж чаддаг байв.

Түүнээс илүү сайн хүүхдүүд байсан.

Мөн түүнээс муу хүүхдүүд ч байсан.

Гэхдээ ухаан, овсгооны хувьд түүнтэй эн зэрэгцэх хүн нэг ч байсангүй. Гэсэн ч Саннигийн нүүрэнд гүн үрчлээ тодров.

'Нэг л зүйл дутагдаж байна.'

...Харгислал.

Түүний дүүд хангалттай харгис зан байсангүй.